Nongpoh, Rymphang 22
Hadien san sngi ba la lap ïa ka metïap jong u heprit ba dang 10 snem ha ka shnong Umtyngar, ki pulit ka Ri Bhoi ki la ïoh ban kem ïa ar ngut ki briew kiba la suba jur ba ki donkti ban pynïap dusmon ïa utei heprit.
Ki pulit ka Ri-Bhoi hadien ba ki la ïoh ka jingujor, ki la pynlong ïa ka jingtohkit kaba mar-mar bad ki la ïoh kem ïa ar ngut ki briew kiba la suba donkti ban dkhat jubor ïa ka jingim jong u heprit Kitborlang Marbaniang ha Umtyngar. Kine kiba la shah kem ki dei na kane kajuh hi ka shnong.
Katkum ka khubor na u Superintendent of Police ka Ri Bhoi, u Jagpal Singh Dhanoa, la ïathuh ba ar ngut ki runar kiba la suba donkti ban pynïap ïa utei heprit ha ka miet jong ka 17 tarik Rymphang ki dei kiba la tip kyrteng kum u Pynshailang Warjri, 32 snem ka rta, na ka shnong Umtyngar, katba uwei pat la tip kyrteng kum u Banshngaiñ Tynsong, 28 snem ka rta, na ka shnong Nongthymmai Lapalang, Pynursla, hynrei uba sah mynta ha ka shnong Umtyngar.
Na ka liang ki pulit ki dang pynlong ïa ka jingtohkit kaba jur ïa kitei ar ngut runar ban lap ïa ka daw halor katei ka jingpynïap bad ruh ban wad ïoh dang don sa kiwei de kiba ïa donkti lang ha katei ka kam pyntriem kaba la pynpar ñiangkhriat ïa ki nongshong shnong ka thaiñ Patharkhmah hi baroh kawei.
