Shillong, Rymphang 23
U Myntri ka tnat pule-puthi ka sorkar jylla, u Rakkam A Sangma, u la ïathuh ba ki don haduh 38 tylli ki Eklavya Model Residential School hapoh ka jylla bad kim pat treikam haduh mynta.
Kane ka jingjubab u Rakkam ka dei hadien ba la buh jingkylli da u MLA ka VPP na Mawlai konstitwensi, Bah Brightstarwell Marbaniang.
Nalor nangta, u Rakkam u la ïathuh ba dei tang ha Pahamsyiem bad Samanda kiba la dep ka jingshna ïa ki skul bad ka sorkar ka la pynkhreh ban sdang pynlong skul noh naduh ka 1 tarik Ïaïong, 2024.
U la ïathuh ba ka jingslem ban tei ïa kine ki skul, ki daw kiba hakhmat ka dei ka jingeh haba ïadei bad ka jaka namar ka Sorkar India lyngba ka tnat Tribal Affair ka kwah ban shna khlem donkam ban siew pisa.
Namarkata, u Bah Brightstarwell u la kyrpad ba dei ban wanrah lang ïa kane ka skul (Eklavya Model Residential School) ha Mawlai Block namar ha East Khasi Hills dei tang ka Mawlai, Sohïong bad Mawpat ki khlem pat ïoh. Kumta na ka liang u Rakkam ruh u la jubab ba un sa thoh biang sha ka Sorkar India.
Ha kawei pat ka jingkylli, u Symbud Myntri Rangbah ba khmih ïa ka tnat kam pohïing bad PWD (Roads & Building) Bah Prestone Tynsong, u la pyntip ba ka sorkar ka la mang pisa ? 50 lak ïa kawei-pa-kawei ka district ba kin pynbha bad maramot ïa ki jaka sah jong ki pulit.
Na ka liang u Saleng uba la wanrah ïa kane ka mat, u la ong ba ki don ki jaka sah jong ki pulit (quarter & barrack) kim long kiba bit ban sah lang bad ki bahaïing-bahasem namar ki don ki jaka sah kiba long kum ki ‘slum’.
Shuh shuh u Bah Prestone u la pyntip ruh ba ha une u snem, ka sorkar ka la wanrah shibun ki jingpynkylla ha ka tnat pulit.
