Shillong, Rymphang 23
Ki MLA na ki konstitwensi bapher bapher ki la kren ha Ïingdorbar halor ka jingdkoh ka Meghalaya Energy Corporation Limited (MeECL) ha ka rukom treikam bad rukom sam bording, nalor ka jingbym lah ban pynmih bording bad hap ban shu thied na kiwei ki kompani ha ka dor kaba rem bad die sha ki paidbah ha ka dor kaba tad.
Kane ka jingïakren ka la wan lyngba ka mat ïatai ha ka dur jong ka ‘Cut Motion’ kaba la wanrah da u MLA ka Congress na Mawhati konstitwensi u Bah Charles Marngar ha Ïingdorbar ha ka Sngi Thohdieng.
U Bah Marngar u la pynsngew ïa ka jingbymbiang ka rukom sam bording ha kylleng ki shnong khamtam ha nongkyndong ha kaba ki nongshong shnong ki ïoh bording ilektrik tang 1 kynta ne 2 kynta.
U Bah Marngar u la kdew ïa ki jingdkoh naduh ka jingkheiñ ïa ka bai bording ilektrik kaba long kumjuh wat haba ym ïoh bording, ka jingduna ki ‘lineman’ bad donkam ban thung briew shuh, ka jingduh u ‘transformer’ bad shimpor haduh 5 bnai ban bujli da uwei pat.
U la ong ruh ba ki don ki shnong thymmai kiba la thep kyrteng ban tan bording hynrei ki khlem pat ïoh da ki snem, bad ki don ruh ki shnong kum ka Amjong ha konstitwensi jong u kaba khlem ïoh bording wat haba la don ki post ilektrik bad waïar. Namarkata, une u MLA na Mawhati u la kyrpad ïa ka Sorkar ban peit ïa kine ki jingeh namarba ki paidbah ki mad jingeh khamtam ha thaiñ nongkyndong.
Na ka liang u MLA ba la rim tam u Dr Mukul Sangma, u la pynpaw ka jingsngewkhia halor ka jingduna ban pynmih bording wat haba ka Jylla ka dei kaba don ka lad ban tei projek ban pynmih bording.
U la ong ba ka Jylla ka hap thied bording ha ka dor kaba rem bad ka die sha ki paidbah ha ka dor kaba tad.
U la ong ba ka Jylla ka donkam bording hynrei ki don shibun ki jingeh bad diengpyngkiang namarba ha ki snem kiba la leit la pyrshang ban ïoh ïa ki nongbei pisa ban tei ïa ki projek bording hynrei khlem lah pynlurong.
U la ong ba tang ka Ganol projek napdeng ki projek kiba la lah ban pyndep bad treikam mynta.
U la kren ruh shaphang jingdonkam ban nym pyntieng ïa kiba wan shane na ka bynta ban bei pisa ban pynïoh bording ha. Ne!
Halor ka jingthied bording na shabar, u Dr Mukul u la ong ba ka jingthied bording kham bun kam myntoi namar ym lah ban ïohnong namar haba thied kham rem hynrei die pat kham tad.
U la ong, kito kiba donbynta ban pynduhnong ïa ka MeECL ki dei ban ngat namar dei tang ka jinglah ban treikam bha kaban ïarap ïa baroh.
Nalor u Dr Mukul bad u Bah Charles Marngar, kiwei ki MLA naduh u Bah Brightstarwell Marbaniang, Dr Celestine Lyngdoh, u Saleng A Sangma ki la ïasnohkti kti lang ban ïashimbynta ha kaba pynsngew ïa ki jingeh jong ki paidbah bad kyrpad ïa ka Sorkar ban thawlad ban pynbiang ïa ka jingai jingshakri naduh ka jingpynbiang kloi ïa u ‘transformer’ uba la don jingthut da kaba wanrah bujli, ka jingsiew pisa ban ïoh post ilektrik bad ‘transformer’ nalor ka jingsam bording sha ki ïing ki bym pat ïoh bording.
