Nongstoiñ, Rymphang:
U Superintendent of Police (SP) ka West Khasi Hills u Bikram Marak u la ong, ka jingleh jong ka Dorbar Shnong Tiehsaw, Nongstoiñ West Khasi Hills ban khanglad ïa ki paidbah ban pynmynsaw bad ban shim ïa ka aiñ ha kti halor ka jingjia shah pynïap ka longkmie hapoh ka shnong, ka la long ka nuksa ba bha ban pyni sha ka pyrthei ba ka Dorbar Shnong ka long kaba shai bad kaba tip ïa ka aiñ. U la ong ruh ba hooid ka long kaba sngewsih halor ka jingduh noh jong ar tylli ki mynsiem ba kordor hynrei da ka jingshimkhia jong ka Dorbar Shnong la ïoh ban kem noh ïa u runar.
U SP u la pynpaw ïa kane haba kren ha ka jingïalang kaba ka tnat pulit jong ka West Khasi Hills lyngba ka shlem treikam ka jong u, ka la ïoh ban pynlong ha ka janmiet jong ka 21 tarik u Rymphang, 2024 ha Dorbar Hall jong ka shnong Tiehsaw ban pynkup burom bad ban ai khusnam sha ka shnong Tiehsaw da ka syrnod bad ka song pisa sha u Bah Moon Dkhar, Sordar ka shnong Tiehsaw.
Ha kane ka sngi la sakhi lang ruh da ki paid nongshong shnong jong ka Tiehsaw ha ka jingdonlang u Bah Herbert Kharkongor, Additional SP ka tnat Crime ka West Khasi Hills District, u Bah Steve Kharmyndai OC ka thanat Nongstoiñ bad kiwei kiwei ki ‘riew rangbah jong ka shnong Tiehsaw.
Katei ka khusnam ïa kaba ka tnat pulit ka WKH lyngba ka shlem treikam u SP ka la ai sha ka shnong Tiehsaw ka long halor ka nongrim jong ka jinglong shlur ki khynnah samla jong ka shnong kiba la kem ïa u Biangkupar Nongsiej uba la shim jubor ïa ka jingim jong ka Wansaralin Wanñiang kaba dei ka kurim jong u ryngkat i khun ba dang don ha kpoh dang ha kine ki khyndiat taïew ba la dep kaba la jia ha ka shnong Tiehsaw.
U SP u la ong ruh ba kumba u la dep ban kren ba na liang jong ki pulit kin pynthikna ba u runar un ïoh ïa ka jingpynsaja kaba tyngeh ïa ka kam sniew kaba u la leh khnang ba kan long ka nuksa ba ka imlang ka sahlang bad kiwei pat kiba don jingthmu ban leh ïa ki kam sniew kin nym nud shuh. Kane ka jingai khusnam ka long tang kum ka dak ban pyni ba lyngba ka jingïatreilang ki bor shnong yn lah ban pynïajan bad ki bor jong ka aiñ khamtam bad ka tnat pulit ban tehlakam ïa ki kam sniew.
