Shillong, Rymphang 23
U Symbud Myntri Rangbah, Bah Prestone Tynsong uba peit ïa ka tnat pulit, u la ong ba ki pulit ki la leh la ka kam bad trei shitom haba ïadei bad ka jingong ba ka la don ka jingïalum ban pynkhlaiñ biang ïa ka Garo National Liberation Army (GNLA).
Haba ïakren bad ki nongthoh khubor, u Bah Prestone u la ong ba ki pulit ki la leh la ka jong ka kam kaba dei ban leh haba ïadei bad kane.
“Ki pulit kin pyndep ïa ka kam bad ngin nym shah ban don kiba ïalum ban pynkhlaiñ biang ïa ka GNLA,” u la ong.
U Bah Prestone u la ong ba lada dei kano-kano ruh ki pulit ki shim ki lad ki lynti ban pyntikna ba kum kata kan nym jia bad ym lah satia ban shah ban don kumta ka jingïalum biang ka kynhun.
Halor ka HNLC, u la ong ba kam pat don kano-kano kaba wan sha ka Sorkar na ka HNLC halor ka jingïakren ïasuk hynrei ka Sorkar ka la ïai khot bad banjur ban don ka jingïakren.
