Jowai, Rymphang 23
Ban pynneh ïa ka shongsuk ha ki jaka ba ïaknieh kum ha Lum Khohskhen, Lum Mynsiang bad Um Saitshyieng, u Bah B. S. Sohliya, District Magistrate ka West Jaiñtia Hills, u la pynjari da ka kyndon 144 Cr.PC.
Ïa kane ka hukum la pynmih namar ba ki paidbah ka shnong Umshangiar hapoh ka Raij Tamu Elaka Nongjngi kim bud ïa ka hukum jong ka ïingbishar u W.K. Kharbuli, Executive Magistrate ka West Jaiñtia Hills District katkum ka Non-FIR Case No. 11/2023 U/S 107/145 CrPC bad katkum ki kaiphod ba la ïoh pdiang na u heh pulit ka thanat Saitsama. La ong ba ki nongshong shnong ka Umshangiar ki dang bteng ban pom dieng na ka jaka kaba dang don hapoh ka jingïakhun mukotduma hapdeng ka shnong Lumlakhiat bad ka Umshangiar.
Katkum ka jinglap jong ki pulit, la ong ba ka lah ban don ka jingktah ïa ka shongsuk shongsaiñ ha Lum Khohskhe, Lum Mynsiang bad ha Um Saitshyieng hapoh Raij Tamu.
Katkum kane ka kyndon la khang ban ïalum paidbah palat san ngut ha kine ki jaka, bad lait noh na ki pulit, la khang ban rah tiar pynmynsaw.
Nalorkata, la khang ban pom dieng, rah wait, kurat da ka jingthmu ban pom dieng bad rah kali da ka jingthmu ban kit ïa ki dieng ba la dep pom na kine ki jaka lait na noh tang ki kali pulit.
Kumta kiba leh pyrshah ïa kane ka hukum kin shah pynngat hapoh ka kyndon 188 IPC. Kane ka hukum kan treikam tang ha kine ki jaka ïakajia.
