Shillong, Rymphang:
U Bah Peter Challam uba dei uwei na ki ‘riew rangbah napoh ka jylla uba la rai ban ïakhun kum u kyrtong shimet ha ka ilekshon Member of Parliament (MP) sha Lok Sabha napoh ka Shillong Parliamentary Constituency ka ban sa long shen, u la kyrpad ïa ki paidbah nongthep ‘vote’ ba kin ai ka jingkyrshan kaba pura ïa u ha kane ka kynti khnang ba un lah ban pyni ïa la ka sap kaba u don hapoh ka ïingdorbar bad wat shabar ka ïingdorbar ruh kumjuh.
Haba kren sha ki lad pathai khubor ha ka Sngi Palei, u Bah Challam u la ong ba lada ki paidbah ki jied bad ki pynjop ïa u kum u MP, un ïeng hapoh ka ïingdorbar hapdeng ki 500 ngut tam ki MP ban kren bad pynsngew ïa ka sur jong ki 35 lak ngut ki paidbah jong ka jylla Meghalaya.
Nalor nangta u la ong ba ka long kaba sngewlehraiñ ban tip ba ka jylla Meghalaya ka la ïoh rung ha ka kyrdan kum ka jylla kaba duk tasam hadien ka Bihar bad ha ka liang ka koit ka khiah, ka pule puthi bad ka rukom im rukom long hapoh ka jylla ruh ka long kaba hiar bha.
“Ka long ka jinglehraiñ kaba khraw wat hadien 52 snem ngi la ïoh ïa la ka jong ka jylla hynrei mynta tang 3.89 lak ki paidbah kiba la jop ïa ka jingduk ha kine ki 9 snem hynrei sa 25 lak tam ki briew kiba dang don hapoh u laiñ jong ka jingduk”, la ong u Bah Challam.
U Bah Challam u la ong ba ki don ki nongthep ‘vote’ kiba la ngiah ban thep ïa ka ‘vote’ jong ki bad ban peit ïa kijuh shu kijuh ki nongmihkhmat ki bym poi shano-shano hynrei kum ki paidbah kiba don ka jingsngew ki dei ban ai ïa ka ‘vote’ jong ki ruh sha u kyrtong uba don ïa kajuh ka jingsngew kum ma ki u ban ïakhun hapoh Delhi bad shabar ba un dawa na ka bynta ka bit ka biang jong ka Meghalaya kaba la sahdien haduh katta-katta.
Shuh shuh u Bah Challam u la ong ba lada ki paidbah ki jied ïa u un ban jur ha kaba ïadei bad ka jingkyrduh kam kyrduh jam jong ki samla ka jylla katba kiwei pat kiba wan nabar ka jylla pat kim kyrduh kam satia.
“Lehse, kane ka jingkyrduh kam jong ki khun samla ne ka jingduk jong ka jylla jong ngi ka dei namar ba ka spah jong ngi baroh ka tuid noh shabar jong ka jylla”, la ong u Bah Challam.
Ha kajuh ka por, u Bah Challam u la kren ruh ha kaba ïadei bad ka jingshim pisa jong ka tnat MPSC haba ki khun samla ki thep kam thep jam ha kaba kane ka jingleh jong ka MPSC ka la ktah jur bha ïa ki khun samla bad ki kmie ki kpa.
“Ka MPSC ka shim da ka dor kaba heh ha kaba ïa kawei-pa-kawei ka kam ki shim T170 bad kumta ter-ter. Kane ka ktah jur ïa ki khun samla jong ngi bad ruh ïa ki kmie ki kpa kiba kyrshan ïa ki khun ki kti ban buh skul bad ynda ki la heh la hap ban siew sa ïa ki dor ban thep kam”, la ong u Bah Challam.
Namarkata, u la kyntu ruh ïa ka MPSC ba kan wanrah noh da kiwei ki rukom bathymmai ha kaba ïadei bad ka jingai ïa ki ‘result’ na ka bynta ki nongwad kam namar haba ka MPSC ka pynmih ïa ka ‘result’ jong ki nongïakhun ïa ki eksam, ym ju ïohi satia ïa ki ‘mark’ jong ki nongïakhun nalor ba ki la siew ïa ka dor kaba rem bad kane ka wanrah ïa ka jingbymhun na ka liang ki samla kiba thep kam thep jam.
“Nalor ba ki siew ïa ka dor ba rem katba ïa ki ‘mark’ jong ki la buhrieh, ka dei ban pynpaw ïa ki ‘mark’ jong ki khynnah khnang ba ki khynnah kin ïohi ïa ka jingtlot jong ki la ka dei ha ka sobjek English, General Knowledge, Aptitude lane ha ka Mathematics khnang ba kan don ka jingkhuid jingsuba ha ka rukom thep kam thep jam bad ba kan pynhun ruh ïa ki khynnah nangne shakhmat ba kin nang ban pyntbit ïalade ha kino-kino ki laiñ bapher-bapher”, la ong u Bah Challam.
U Bah Challam u la khot ruh ïa ki kmie ki kpa kiba shim ram ïa ki khun ban phah pule, ki nongseng kam lajong bad ki nongrep kiba la shah ktah na ka jingshim ram jong ki na ka sorkar ban leh ïa ki kam jong ki, ki lah ban wan mih sha ka shlem treikam jong u kaba don ha Laitkor, Nongdaneng ha ryngkat bad ki kot ki sla kiba biang ban ïakren halor kane ka jingmap noh na ka bynta ki ram ba ki la shim.
