Shillong, Rymphang 23
Ka sur jong ka jingpyrshah ban wanrah ïa ka lynti rel hapoh ka East Jaiñtia Hills District ka la mih na ki kynhun bapher-bapher ym tang na ki sengbhalang hynrei wat na ka kynhun ki trai kali kiba don hapoh ka synjuk jong ka Jaiñtia Hills Truck Owner Association (JHTOA) ruh ki la pynpaw ka jingpyrshah jur halor ka jingthmu jong ka sorkar jylla ban pynpoi ïa ka lynti rel hapoh katei ka thaiñ.
Haba kren sha ki lad pathai khubor ha ka Sngi Thohdieng ha Shillong Press Club, u President ka JHTOA, Bah Biangshwa Shylla, u la ong ba ka jingpyrshah jong ka kynhun ban wanrah ïa ka lynti rel hapoh ka thaiñ ka dei namar ba lada wan ka lynti rel, kan ktah bad kan pynduhnong shikatdei eh ïa ki trai ba buh kali kit mar namar ba ka rel kan kit da ki hajar ton ïa ki tiar ym kum ki kali kiba kit kham duna ton bad khnang ba kum ki trai kali ruh kin nym duh kamai satia.
“Ngi na ka liang ka seng, ngi lah ïalum bad pynlong jingïalang na ka por sha ka por ban pyrshah jur halor kane ka lynti rel namar lada wan ka lynti rel shatei, ngi kiba buh kali bad kiba kamai jakpoh bad bsa ha ïing ha sem lyngba ka kit ka bah da ki kali, kan long ka jingduhnong kaba khraw ïa ngi”, la ong u Bah Shylla.
U Bah Shylla u la ong ruh ba halor ba ka jylla Meghalaya ka la dei lypa ka jylla kaba rit bad kumta ka long kaba sheptieng ba ynda la poi ka lynti rel hapoh Jaiñtia, ka jingwan rung tuh bad ka jingwan buhai shnong ki barjylla ruh kan long kaba shyrkhei hapoh kitei ki thaiñ bad hapoh ka jylla.
“Lada ka sorkar ka pyntrei jubor, ngi na ka liang ka seng ngin nym ailad bad ngin ïeng pyrshah halor kane haduh ban da ïoh jingjop”, la ong u Bah Shylla.
Shuh shuh u Bah Shylla u la khot bad kyrpad lem ruh ïa ki para sengbhalang bapher-bapher ba kin ïatreilang bad ka kynhun ban pyrshah ïa kane ka jingthmu jong ka sorkar ban wanrah ïa ka lynti rel hapoh ka thaiñ.
Na ka liang u President ka Association of Meghalaya Traders and Transporters, u Bah Enrico D. Pasi, u la ong ba nalor ba ki kali jong ki la hap ban shu set kumto namar ba jan baroh ki karkhana pynmih dewbilat ki la don ïa la ki jong ki kali kit dewbilat ban pynpoi ïa ki dewbilat sha ki jaka bapher-bapher. Kumta lada ka wan sa ka lynti rel lei kam don jingmyntoi shuh ïa kitei ki trai ba kin buh ïa ki kali jong ki bad kane kan pynïap ïa ka kamai-kajih jong ki.
“Haba mynta kim ailad ïa ngi ki trai ri ba ngin kit ïa ka mar, lada wan lei sa ka lynti rel hapoh ka East Jaiñtia Hills, ngi la kut syndon”, la ong u Bah Pasi.
