Shillong, Rymphang 23
Ka Sorkar Jylla ka la wanrah ïa kawei ka aiñ-rew ha Ïingdorbar ha ka Sngi Thohdieng kaba kyrteng ka Meghalaya State Investment Promotion and Facilitation Bill, 2024 ka ban plielad ban pynïoh kham kloi ki jingbit kiba donkam ban ïoh na ki tnat bapher bapher bad ki bor ba dei khmih ka Sorkar ban seng karkhana ne kin-kino ki kam lajong bad ban kyntiew ïa ki kam pynroi bad ka ïoh ka kot ha ka Jylla.
Ïa kane ka aiñ rew la wanrah da u Myntri Rangbah Conrad K Sangma.
Ha kane ka aiñ rew la batai ruh shaphang ka jingpynsuk ban leh ki kam khaïi bad plielad ka ban pynsuk ruh ïa ka jingbei pisa ha ka Jylla.
Hapoh jong kane ka aiñ yn thaw ïa ka Invest Meghalaya Authority ka ban long ka bor bahakhlieh bad ka ban hap hapoh ka Governing Council ha kaba u Chairman un dei u Myntri Rangbah, u Vice Chairman un dei u Myntri ba peit ïa ka tnat karkhana bad kam khaïi, bad baroh ki Myntri Sorkar kin dei ki dkhot, u Chief Secretary ruh kum u dkhot ka Governing Council nalor u ophisar ka tnat Planning Investment Promotion and Sustainable Development kum Member Secretary. Ki dkhot ki kynthup ruh ïa u Secretary ka tnat Pla Tyngka, bad kiwei kiwei.
Katkum ka jingbatai la ong ba ka Sorkar Pdeng ruh ka la buh hakhmat eh ïa ka jingdonkam ban kyntiew ïa ki kam lajong ha ka ri da kaba pynsuk ban leh ïa ki kam lajong (ease of doing business) ban kyntiew ïa ka jingbei pisa bad ki kam lajong.
