Shillong, Rymphang 25
Ki jingjia pluh ïing kiba kham shyrkhei mynta ki la jia ar tylli ha nongbah Shillong tang hapdeng ki saw bnai. Man kaba jia kumne, bunsien ym ju tip tikna ïa ka daw jong ka jingjia, hynrei la suba borabor bad ka dei ka jingthut jong ka bording.
Ha ka 14 tarik Risaw, 2023, kawei ka jingpluh kaba shyrkhei la sakhi ha thaiñ Khyndai Lad ha kaba kawei ka ïing mala ka la julor lut baroh kawei namar ka ding kaba klang ka la bamduh ïa ka ha kaba ki pulit pynlip ding ruh kim shym la lah ban pynlip hadien shisngi.
Ka jingkhapngiah ki lynti ban rung sha kane ka jaka bad jingdon ki tiar ki tar hapoh jong kane ka ïing bun mala ka dei ka daw bah bym lah ban tehlakam ïa ka jingklang jong ka ding.
Haduh mynta ym tip shai kaei ka daw jong ka jingkemding kane ka ïing kaba bun mala bad ym tip satia la ka bor pynïaid district kan pynpra noh ïa kane ka ïing ne yn dang shah ba kan ïeng da kaba shu maramot.
Ka jingkylli haduh mynta ka long, hato dei ka jingthut ka bording ilektrik kaba pynlong ïa kane ka ïing ban pluh?
Tang hapdeng saw bnai, la sakhi sa ïa ka jingpluh kaba shyrkhei jong ka shlem treikam ki nongsaid aiñ kaba tip kum ka Shillong Bar Association ha miet 24 tarik mynta u Rymphang, 2024. Kane ka ïing ka dei kawei na ki ïing kaba la rim bha ha Shillong kaba la don naduh ki snem 1900 shaneng. Kane ka ïing ka la don palat 110 snem naduh ka por jong ka Sorkar Phareng.
Ïa kane ïing la suba ba ka jingpluh ka dei namar ka jingthut jong ka bording ilektrik.
Man ka por bun ki ïing kiba pluh bad duh lut ïa ki jingdon jingem ka dei namarba ka jingbym treikam bha ka bording ilektrik khamtam ki waïar kiba pynïasoh ban pynpoi ïa ka ilektrik sha ki ïing.
Lada ka ding kam slem ban bamduh ïa ki ïing dewbilat tang na ka daw jong ka jingthut ka bording ilektrik, katno tam lei ïa ki ïing rim kiba la shna naduh hyndai-hyntai da ki dieng.
Kumta ki mih ki jingkylli haba ïadei bad kum kine ki jingjia khamtam lada dei na ka daw ka jingthut ka bording. Hato ki bor ba dei khmih ka tnat bording khamtam ka MeECL ki ju pynlong ne em ka jingkhmih bniah ban pyntikna ba ki waïar kiba tan bording bad kiwei kiwei ki tiar kiba pyndonkam ki dei ban long kiba dang biang khamtam ha ki ïing kiba heh naduh ki shlem treikam jong ka Sorkar haduh ki ïing jong ki riewshimet.
Ki dang don bun tylli ki ïing rim kiba shna da ki dieng naduh mynhyndai bad kumjuh ki ïing mala kiba la tei da ka dewbilat kiba don ha ka jingma lada ki bor ba dei khmih kim peitngor khamtam ïa ka rukom pyndonkam ïa ka bording bad kan long kaba shngaiñ.
Ha kine ki khhyndiat snem, kawei ka ïingmane kaba la rim ha Shillong jong ka Balang U Blei kaba don ha Qualapatty ruh ka la ingkhong na ka daw ka jingpluh kaba shyrkhei.
Ki don bun tylli ki ïing kiba ka ding ka la bamduh na ka daw ka jingthut ka bording ilektrik.
Ka bording ilektrik ka dei kawei ka jingdonkam kaba donkam tam eh ha ka jingim briew ha kine ki sngi, bad ha kajuh ka por ka dei kaba ma tam haduh katta katta lada ym phikir ïa ka.
Ka long ruh kaba suk ban kynnoh ba ka daw jong ka jingpluh ka dei namar ka jingthut ka bording lada ym tohkit bniah ïa ka jingjia namar ki don ruh ruh lehse kiwei pat ki daw kiba pynlong ïa ka jingpluh.
Ki don ki ïing kiba pyndonkam ïa ka bording khlem sngewthuh ïa ka jingkhlaiñ bad jingtlot jong ka bording kaba pynlong ruh ban don ka jingma.
Kumta ki bor ba dei khmih ki donkam ban tih bniah, bad donkam ruh ban pyntikna ba ka jingtan bording sha ki longïing jong ki riewshimet bad ki shlem treikam bapher bapher ka dei ban long kaba shngaiñ, ym ban buh jingma.
