Jowai, Rymphang 25
U Symbud Myntri Rangbah ka Jylla uba khmih ïa ka tnad Pynroi Sor, Bah Sniawbhalang Dhar, ha ka 24 tarik Rymphang u la buh mawnongrim ban tei ïa ka ’30 Bedded Integrated AYUSH Hospital’ ha shnong Mookyndur, West Jaiñtia Hills.
Ïa kane ka jaka sumar kaba 30 jingthiah yn tei ha ka dor kaba T.10 klur ha ka jaka kaba heh 5 akar ba la ai sngewbha da ka shnong Mookyndur.
Nalor u Symbud Myntri Rangbah, la donlang ka Myntri ka tnad ka koit ka khiah, ka Dr. M. Ampareen Lyngdoh, u MLA Jowai, Bah Wailadmiki Shylla, nalor kiwei-kiwei.
U Bah Sniawbhalang Dhar ha ka jingkren, u la ong ka jingdon kane ka Hospital AYUSH kan ïarap shibun ïa ki paidbah ka thaiñ kiba donkam jingsumar lyngba ka AYUSH bad ‘Homeopathy’.
U la pynsngew ruh ïa kiba bun ki kam babha ba ka Sorkar MDA-II ka leh na bynta ka jingmyntoi u paidbah bad ka Jylla.
Shuh shuh, ka Dr. M. Ampareen Lyngdoh ha ka jingkren ka la ong lyngba kane ka Hospital yn ïoh ki jingsumar lyngba ki doktor kiba tbit bad kane ka hospital kan ai ïa ki jingsumar ha ka ‘Ayurveda’ bad ‘Homeopathy’ khamtam ïa ki jingpang ki bym ïabit kum ka jingpang shyieng, shini nalor kiwei ki jingpang.
