Shillong, Rymphang 25
Ka Deputy Commissioner jong ka East Khasi Hills, Kong R.M. Kurbah ka la hukum da ka jingtohkit majistor halor ka jingpluh ka shlem treikam jong ka Shillong Bar Association ha ka miet Sngi Saitjaiñ.
Ka ding kaba klang ha ka miet Sngi Saitjaiñ ka la bam duh ïa ka shlem treikam jong ka Shillong Bar Association kaba don sha lyndet jong ka shlem treikam Deputy Commissioner, East Khasi Hills.
Katei ka shlem treikam kaba la shna ha ka dur jong ka ïing-dieng ka la ïeng ha katei ka jaka naduh u snem 1913.
Katkum ki jingtip ba la ïoh lum, katei ka jingjia ka la jia ha ka por kumba 10 baje mynmiet bad ïa ka daw ym pat lah ban pyntikna wat la ka don ka jingsuba ba ka lah ban dei namar ka jingthut ha ka bording.
Katei ka shlem treikam ka don ïa 2 tylli ki kamra kiba heh nalor kiba rit, bad ki tiar ki tar kiba don hapoh ki kynthup ïa ki ‘File’, ki kot ki sla donkam, komputor, ‘Xerox Machine’ bad kiwei-kiwei.
Na ka liang ka Shillong Bar Association ka la ujor da ka ejahar sha ki pulit na bynta ka jingtohkit haba ïadei bad katei ka jingjia naba ïa ka daw jong ka jingklang ka ding ym pat lah ban pyntikna.
Ka Kong Kurbah ka la ong ba ka jingtohkit kaba sdang (initial inquiry) ka kdew ba ka daw jong ka ding ka dei namar ka jingthut ha ka bording.
“Ngi la hukum da ka jingtohkit majistor hapoh ka jingpeit u Bah Wahlang ban khmih bniah ïa baroh ki bynta,” la ong ka Kong Kurbah.
Ha ka miet jong katei ka jingjia, u Myntri Rangbah ka Jylla, u Conrad K. Sangma, ha ryngkat ka jingsynran lang u Symbud Myntri Rangbah ka Jylla, Bah Sniawbhalang Dhar nalor kiwei-kiwei ki ophisar Sorkar ki la wan poi lang ha katei ka jaka.
U Sangma haba kren sha ki lad pathai khubor u la pynpaw ka jingsngewsih halor kaei kaba la jia bad ong ba haduh mynta ym pat lah ban pyntikna ïa ka daw hynrei i kumba dei na ka jinglong-jingman jong ka bording kaba la ïalam sha ka jingklang jong ka ding.
Ha kajuh ka por, u la ïathuh ba donbok ba ym shym la don kano-kano ka jingjia kaba sngewsih wat la ka la don ka jingjulor ha ki jingdon-jingem kumjuh ki kot ki sla donkam.
Shuh shuh u la bynrap ba ka Sorkar kan sa peitngor halor katei ka jingjia.
