New Delhi, Rymphang 25
Ki pulit jong ka nongbah Delhi ki la ïoh kem ïa u Hanif Shaikh uba dei u dkhot ka SIMI hadien 22 snem jong ka jingthwet.
Ki pulit ki la thwet ïa u Shaikh naduh ba la pynrung ïa ki jingujor pyrshah ïa u hapoh ki kyndon jong ka aiñ Unlawful Activities (Prevention) Act (UAPA) ha u snem 2001.
U Shaikh u dei u Editor jong ka ‘Magazine’ “Islamic Movement” ba la pynmih da ka SIMI, bad ha kine ki 25 snem, u la lah ban pynbiej ïa kiba bun ki samla Muslim lyngba ki jinghikai jong u, la ong ki pulit.
Ha ka banyngkong, ki pulit ki khlem don jingtip ba thikna halor u Shaikh bad ki la shu tip tang ka kyrteng kum u ‘Hanif Hudai’, bad kane ka dei ka kyrteng ba la pynmih ha ka ‘Magazine’ “Islamic Movement”.
La ong ba u Shaikh u la shong la sah ha Bhusawal ha Maharashtra bad katkum ka jingïathuh jong u Deputy Commissioner of Police (DCP) ka Special Cell, u Ankit Singh, une u dei u ‘riew pyntriem bashyrkhei.
Ki la don ki jingujor pyrshah ïa u Shaikh hapoh ka UAPA bad ki kam ïaleh pyrshah ïa ka Ri ha Maharashtra.
La ong ruh ba u Shaikh u la ïashim bynta ha ki jingïalang jong ka SIMI kiba la long ha Maharashtra, Madhya Pradesh, Delhi, Karnataka, bad Kerala bad kawei ka ïingbishar ha Delhi ka la pynbna ba u dei u nongphet rieh ha u snem 2002.
Na ka liang ki pulit ki la thwet beit ïa u hapdeng ka jingïoh jingtip ba u la pynkylla ïa la kyrteng sha u Mohammad Hanif. La ong ruh ba u la trei kum u nonghikai ha kawei ka skul Municipal ha Bhusawal.
Ki pulit, hadien ba ki la ïoh ïa ki jingtip kiba biang, ki la pynlong da ka jingpynap shrip ïa u Shaikh ha ka 22 tarik Rymphang bad ki la ïoh kem ïa u na Bhusawal.
U Hanif Shaikh u la pyndep ïa ka ‘Diploma’ na Marul Jalgaon ha u snem 1997. Ha une ujuh u snem, u la pynïasoh bad ka SIMI, bad u la long u dkhot bapura. Naduh ba u la don bad ka SIMI, u la ïashim bynta ha kiba bun tylli ki jingïalang bad u la don bynta ban ïalam bakla ïa ki samla Muslim khnang ba kin pynïasoh bad kane ka seng kaba la shah ñiew kum ka seng be-aiñ ha ka Sorkar India.
Ha u snem 2001, u heh ka SIMI, u Sahud Badar u la pynlong ïa u Shaikh kum u Editor ka “Islamic Movement”. Kum u Editor, u Shaikh u la thoh bun bah ki jingthoh kiba kynshoit ïa kiwei pat ki para Muslim bad u la pynpaw ïa kita ki jingshah ban beiñ jong ki Muslim.
Nalorkata, la ong ba ha ka por ba ki pulit ki la pynlong ïa ka jingkhynra ha u snem 2001 ha Delhi, u Shaikh u la ïoh phet bad naduh kata ka por, u la don hapdeng ka jingphet rieh. Une u briew u la phet na kawei ka jaka sha kawei pat haduh ba un da poi ha Bhusawal na Jalgaon.
Hadien ba ka SIMI ka la shah ñiew be-aiñ, kiba bun na ki dkhot ki la saphret. Ki la don kiba la bteng ïa ki kam pyntriem kum ki ‘riew shimet bad ki la donkti ha ki kam pynbthei bom bad kiwei ki kam be-aiñ.
Ki la don ruh ki dkhot barim ka SIMI kiba la thaw ïa ka kynhun bathymmai ba la tip kum ka “Wahdat-e-Islam” bad kiba bun na ki dkhot jong kane ka seng ki dei na ka SIMI. Ka thong jong kane ka seng ka long ban pynïatylli ïa ki samla Muslim bad ban pynsaphriang ïa ki jinghikai ehrang jong ka Islam.
U Shaikh u la long uwei na ki dkhot ka Wahdat-e-Islam bad u la don ka bynta ka bakongsan ha Maharashtra bad ki jylla ba marjan. La ong ruh ba u la don bynta ban lum pisa na ka bynta kane ka kynhun khnang ban kyrshan ïa ka SIMI bad ïa ka Wahdat-e-Islam.
