Jowai, Rymphang 25
Ka ïingbishar High Court jong ka Meghalaya ka la maham ban khot hajir pyrshah ïa u Chief Secretary ka Sorkar Jylla bad Commissioner & Secretary ka tnad District Council Affairs lada ym don ki ban wan mihkhmat na ka liang jong ki ha ka jingpynsngew (hearing) kaba saw haba ïadei bad ka jingtian bishar halor ka jingpynkheiñ ïa ka hukum jong ka ïingbishar.
Ka ïingbishar ka la pynmih ïa kane ka hukum haba pynsngew halor ka jingujor pynkheiñ hukum ba la ujor da ka JHADC Staff Association pyrshah ïa ka Barcelona Bamon, Secretary JHADC, Chief Secretary ka Meghalaya bad Commissioner & Secretary – District Council Affairs ha ka 21 tarik u Rymphang.
Na ka liang ka ïingbishar ka la shim khia halor katei ka jingbym wan mih na ka liang jong ka Sorkar Jylla ha ka jingtian bishar halor ka jingpynkheiñ ïa ka hukum jong ka ïingbishar wat hadien ba la pynlong ka jingpynsngew ïa ka jingtian bishar ha ka sien kaba lai.
Ïa ka jingpynsngew kaba nyngkong la pynlong ha u Nohprah mynshem snem bad ka jingpynsngew kaba ar ha ka 6 tarik u Rymphang.
Katkum ka hukum jong ka ïingbishar la ong, “Wat la pyndep ïa ka jingshim kam na ka bynta kawei ka liang, kata kaba kynthup ïa u Chief Secretary ka Sorkar Meghalaya bad Commissioner & Secretary, District Council Affairs Department, hynrei ym shym la don satia ki ban wan mihkhmat na ka bynta jong ki.”
Kane ka hukum ba dang shen ka pyntip ba ka ïingbishar ka la shim khia bha halor kane ka kam.
“Lada ym don ki ban wan mihkhmat ha kawei pat ka tarik ba la pynbeit, kitei ar ngut ki heh Sorkar dalade hi kin hap ban wan hajir,” la ong ka hukum jong ka ïingbishar.
Na ka liang ka ïingbishar ka la ai por biang sa ar taïew na ka bynta ban ‘file’ ïa ka ‘affidavit’ kumba la kyrpad da u muktiar uba la mihkhmat ïa ka Barcelona Bamon.
