Shillong, Rymphang 25
Ka jingsengkam sengjam lajong ym tang ba ka lah ban ïarap tang ïalade shimet hynrei ka thawlad thawlynti lang ruh ïa kiwei de ki khun samla kiba im khlem kam khlem jam. Lada na ka liang ka Sorkar pat kam lah ban phai khmat sha kane ka bynta ban ai jingïarap ha kino-kino ki liang ïa kum kine ki briew, ka pynduh mynsiem noh ïa kiba don ka jingthrang ban leh eiei na ka bynta ka Ri bad ka Jaidbynriew bad ban kyntiew ïa ka Jylla kham shalor.
Wat la hapdeng kane ka juk kyrduh kam kyrduh jam hynrei ka khlem pynduh mynsiem bad ka khlem pynrandien satia ïa u samla Pynskhemlang Uriah ba un tur shaphrang ban wad da kiwei pat ki lad ki lynti kiba kham pher ban ïeng ha la ki jong ki kjat bad ban ai jingïarap lem ïa kiwei ki khun samla lyngba ka shlem treikam kaba u la seng.
U samla Pynskhemlang W. Uriah u dei u samla uba la heh la san hapoh ka shnong Jaïaw. U dei ruh u nongseng bad u Managing Director jong ka Jets 24×7 kaba dei ka lad ai jingshakri ïa ki paidbah nongleit-nongwan lyngba ki thuk-thuk kiba la pynbiang hi da ka JETS 24×7.
“Ngam lah ban leh marwei ïa kane ka kam wat la nga don ka jingshemphang ha ki katto-katne bynta hynrei nga donkam pat ïa kiba kham tbit kum ka kynhun ban ïatreilang namar lada ka dei ka kam kaba suk, kiba bun ki la leh lut hynrei namar ba ka long kaba jynjar kumta ka long kaba donkam ban ïatreilang bad ban don da ka kynhun”, la ong u samla Pynskhemlang.
U la ïathuh ba ka JETS 24×7 ka la ïoh ïa ka laisen bad ka jingithuh na ka Sorkar ha ka 10 tarik u ‘nai Ïaïong, 2023 hynrei haduh mynta pat ïa ka ‘Permit’ kim pat ïoh satia.
U la ïathuh ba ki nongñiah bad ki nongkamai hapoh ka JETS 24×7 mynta ki don palat 400 ngut.
Na ka liang u samla Pynskhemlang u la pynpaw ka jingeh kaba khraw ha kaba ïadei bad ka jingbym pat ïoh ïa ka ‘Permit’ na ka bynta ki nongkamai ïa ka JETS 24×7 bad kumta kim pat lah ban pyllait ïa ki nongñiah ha kaba teng-teng ka long kaba jynjar wat ban ïoh ban shong bad pyndonkam ïa kitei ki thuk-thuk.
Haba kylli kaei ka jingïapher hapdeng ka JETS 24×7 bad ka Rapido, u samla Pynskhemlang u la ong ba kine artylli ki kompani shakri paidbah ki ïasyriem hynrei ka jingïapher kaba kham heh pat ka dei ba ka JETS 24×7 ka don ïa ka laisen kaba la ïoh jingithuh da ka Sorkar katba ka ‘Rapido’ pat ka dei kaba la wan nabar ka Jylla bad kamai be-aiñ hapoh kane ka Jylla khlem kano-kano ka jingsiew ïa ki bai khajna sha ka Sorkar.
U la ong ba ka Meghalaya ka dei kaba don ïa ki kyndon aiñ ha kaba ïadei bad ka rukom kamai jong ki thuk-thuk lane ki kali kamai ïa kaba la tip kum ka Meghalaya Taxi Aggregator Operational Rule, 2020.
“Lada ki paidbah jong ngi ruh ki pyndonkam ïa kane ka lad jingshakri na ngi ki kompani kiba dei napoh ka jylla, ka jingmyntoi kaba ki ïoh ka long ka jingïoh duna ha ka dor bai shong, ka jingshngaiñ bad ngi ïaleh ruh katba lah ban pyndonkam da ki thuk-thuk bording ki bym pynmih ïa ka lyer kaba jakhlia ba kan ïarap ïa ka mei-mariang”, la ong u samla Pynskhemlang.
