Shillong, Rymphang 25
Ka North East Students’ Organisation (NESO) ka la kyntu ïa ka Sorkar ban ïakren bad baroh ki kynhun kieng atiar khnang ba ka suk ka saiñ kan wanphai biang sa shisien ha Manipur.
“Ka Sorkar ka dei ban bteng ïa ka jingïakren ïasuk bad ban shim ki sienjam ban ïakren bad baroh ki kynhun kieng atiar na bynta ban poi sha ka jingïabeit kaba lah ban pdiang da baroh na bynta ban ïada bad kyntiew ïa ki trai-ri ka Manipur, kumjuh ka ban wanrah ïa ka suk ka saiñ kaba neh,” la ong u Chairman ka NESO, Bah Samuel B. Jyrwa ha ka kyrwoh khubor.
Ha kawei ka liang, ka seng kaba mihkhmat ïa 8 tylli ki kynhun seng ha ki 7 tylli ki Jylla ka Thaiñ Shatei Lam Mihngi ka la pynpaw ka jingsngewkhia bad pynrem jur halor ka jingbthei bom kaba la jia ha ka 23 tarik Rymphang ha phyllaw jong ka All Manipur Students’ Union (AMSU) kaba ha DM University, Thangmeiband, Imphal.
Katei ka jingjia ka la ïalam sha ka jingduh noh ïa uwei u samla pule, u Oinam Kenejy, uba pule ha DM College bad ka jingmynsaw jur jong uwei pat, u Salam Michael uba na kane kajuh hi ka jaka pule.
“Ka NESO ka pynpaw ruh ka jingsngewkhia halor kiba bun ki jingjia kiba la jia kum ka jingshah thang ka shlem treikam jong kawei ka kynhun seng trei mon sngewbha ba hakhmat, kum ka UMC ba kynthup ïa ka skul Macha Leima, ka jingpynjulor ïa kiwei-kiwei ki shlem treikam seng trei mon sngewbha bad ka jingpynjulor ïa ka ïingsah jong u Sinam Prakash, nongaibuit ka NESO,” la ong u Bah Jyrwa.
U la ong ruh ba kum ka kynhun seng samla kaba hakhmat – ka AMSU ka la pynneh barabor ïa ka jinglong ka bym don jingïadei bad ki kam saiñ pyrthei bad ka bym ju pdiang ïa ki kam ïakynad la ka long ha kano-kano ka rukom.
Ka seng ka la ban jur ba ha kum kane ka por, ka long kaba donkam ïa ki paidbah ban btin lynti bad pyntikna ba ka AMSU kan ïai bteng ban long ka seng ka bym don jingïadei bad ki kam saiñ pyrthei bad kaba don bynta ha ki jingïakhih ki bym kynthup ïa ka jingkulmar.
“Kine ki jingjia ki la wanrah ka jingkulmar jingmut bad ka jingsheptieng ha ka jingmut jong ki samla bad u paidbah ba bun ba lang,” u la ong.
Ka NESO ka kyrpad na bynta ka jingjai-jai khnang ba ka shong suk shong shngaiñ kan wanphai, ha kajuh ka por, ka kyntu jur ïa ka Sorkar ban shimkhia da kaba tehlakam ïa ka jinglong-jingman, ban pynneh ïa ka suk ka saiñ kumjuh ban pynshitom ïa kiba donkti katkum ka aiñ.
Kum ban shu kdew hangne, ka NESO ha u snem ba la dep ka la sdang ïa ka kam ban wanrah ïa ka suk ka saiñ hadien jong ka jingïakynad ha Manipur bad halor kane, ka seng kan ïai bteng ïa kane ka kam bad ka ngeit ba baroh kiba don ka jingsngewkhia kin shim khia ïa kane bad kyrshan na bynta ka suk ka saiñ ha Manipur.
