Nongpoh, Rymphang 25
Ha kawei ka jingjia ha ka miet Sngi Saitjaiñ, kawei ka ‘auto’ trok lem bad kawei ka JCB ki la lait salit na ka jingkem ding hadien ba 2 ngut ki runar ki bym lah satia ban ithuh durkhmat ki la leit ban kawang ‘petrol bomb’ ïa ka phyllaw ïing jong u Bah Lovercuf Nongshli kaba don ha Umsning Patarim.
Katkum ki jingtip ba la ïoh lum, la ïathuh ba katei ka jingjia, ka la jia ha ka por kumba 1:20 baje mynstep bad dei lyngba ka jingïohi kloi jong ki trai ïing ba la lah ban pynlip noh ïa katei ka ding bad lait na kino-kino ki jingmynsaw ïa ki mynsiem briew, lait tang ka jingjulor ba malu-mala ïa katei ka JCB bad ka ‘auto’ trok.
Shuh shuh la ïoh jingtip ruh ba katei ka ‘auto’ trok ka dei kaba don ïa u nombor ML-10-A-4205 kaba la long trai da uwei bar jylla ba la tip kyrteng kum u Horander Prasad kaba ju pyndonkam ban kit ïa ki mar bam-mar dih.
Halor katei ka jingjia, na ka liang ki pulit jong ka thanat Umsning tang mar ïa ïoh jingtip, ki la leit mar-mar ban pynlong ka jingtohkit bad khamtam eh ban ïoh kem ïa ki briew kiba donkti halor katei ka kam runar.
