Shillong, Rymphang 25
U Myntri Rangbahduh, Narendra Modi u la sakhi ïa u mawmer mynta ka sngi da kaba aiti sha ka ri bad buh mawnongrim ïa ki projek bapher-bapher kiba tam ïa ka T 48,100 klur ha Rajkot, Gujarat.
Kine ki projek ki dei ha ki kam ka koit ka khiah, ki surok, lynti rel, ka ‘petroleum & natural gas’, ki kam jngohkai bad kiwei-kiwei.
Kum shi bynta jong kane ka sienjam, u Myntri Rangbahduh, Narendra Modi u la pyndonkam ïa ki lad ‘digital’ ban plie bad pyllait paidbah ïa 2 tylli ki kali Mobile Food Testing Laboratory, (FSW) mynta ka sngi ha ka State Central Library, Shillong ha ka jingdon lang ka Myntri Sorkar Jylla ba dei khmih ïa ka tnad ka koit ka khiah, Dr. Mazel Ampareen Lyngdoh.
Kane ka dei ka sienjam ba heh ban kyntiew ïa ki lad peit bniah ïa ki mar bam ha Meghalaya.
Kine 2 tylli ki lad jong ka Food Safety Standards Authority of India (FSSAI) ban peit bniah ïa ki mar bam ki dei kiba tip kum ka Food Safety on Wheel (FSW).
Kane ka dei ruh ka sienjam ban pyntikna ïa ka jingshngaiñ ki mar bam ha baroh ki jaka.
Ki FSW kiba la pynbiang lut ki jingai jingshakri bad kiba don ïa ki nongtrei kiba la tbit ha ka kam, kin kyntiew ïa ki lad peit bniah bad kin ai jinghikai ruh shaphang ki rukom ki ban kyntiew ïa ka jingshngaiñ ha ki mar bam.
Shuh shuh, kin pynsaphriang jingtip sha ki paidbah da kaba poi sha ki jaka ba kyndong tam jong ka jylla.
Ka jingwanrah ïa kine 2 tylli ki FSW ha Meghalaya ka wan ruh ha ryngkat ka projek kaba kot sha ka T. 0.95 klur.
U Commissioner, Food Safety, Meghalaya Dr. Joram Beda bad ka Deputy Commissioner, East Khasi Hills District, Kong R.M Kurbah, bad kiwei-kiwei ki la ïashim bynta lang ha kane ka prokram.
