Shillong, Rymphang 25
Namar ka jinghap jong u slap ha ka step jong ka Sngi U Blei, ka Balang Presbyterian Nongum bad ki bor pynïaid jong ka Khasi Jaiñtia Presbyterian Synod Sepngi ki la hap sangeh ban pynlong jingïaseng paidbah ha madan hynrei ban pynlong noh hapoh ïingmane.
Kane ka jingïaseng KJP Synod Sepngi ki samla kaba Arphew Ar kaba la long ha Balang Presbyterian Nongum kaba hap ha Eastern West Khasi Hills District ka la sdang naduh ka 23 tarik bad pynkut ha ka 25 tarik Rymphang, 2024.
Ka jinghap jong u slap ha kane ka sngi ka la pynthut ruh ïa ka leit ka wan jong ki nongwan jingïaseng namar ka surok ka la ktieh khamtam ka surok khyndew ba dang shu shna bym pat siang rong.
Namar ki riewngeit ki la poi da ki phew hajar ngut, ka jingïaseng haba long ha ïingmane ka la khapngiah ban rung bad mih sha phyllaw. Kane ka la pynlong ïa ki parabangeit ba kin shong ha madan, lynti ïaid kjat bad shajrong lum tang ban ïoh shah shkor ïa ka jingïaseng kaba long hapoh ïingmane.
Ha ka jingïaseng kaba 10:30 mynstep la sam ïa ka ktien jong U Blei da u Rev. I.M Nongsiej bad la pynrhem shuh shuh ïa ka jingïaseng da ki sur jingrwai na ka Jingïaseng Khynnah Balang Nongum, Standing Choir Mairang Presbytery, Mawbuh Ribhoi Presbytery, Laitkseh Presbytery, KJP Synod Standing Choir.
Ha ka jingïaseng kaba 1:30 noh phai sngi, la sam ïa ka ktien jong U Blei da u Rev. (Dr.) M.J Hynñiewta bad la pynrhem shuh shuh ïa ka jingïaseng da ki sur jingrwai na ka Balang Nongum, Standing Choir Parïong Presbytery, Sohïong Presbytery, KJP Synod Sepngi bad ïa ka jingïaseng la pynïaid da u Rev. TT Diengdoh uba dei u Chairman ka Jingïaseng Samla KJP Synod Sepngi.
U Rev. M.J Hynñiewta u la sam ïa ka ktien u Blei da kaba sot na ka kotbah na ka Jingrwai Salm 124, dkhot 1-8.
Katba u Rev. IM Nongsiej, u la ong baroh ym dei trai shnong ha kane ka pyrthei, hynrei ka jinglong trai shnong ka dei ha bneng namar ïa kane u Paul u pynkynmaw ban im bad ka gospel u Jisu Khrist.
U la ong ba ha kane ka juk kaba mynta ki briew kim shym la pynïadei dur ïalade bad u Jisu Khrist hynrei ki la kyrsum ktieh bad ki jingsngewbha pyrthei da kaba ngop ha ki jingdih bad ki jingpynshoi kiba bun ban shah teh mraw syndon ha ka buit jong u soitan.
