Itanagar, Rymphang 25 (UNI)
Mar ar ngut ki MLA jong ka seng National People’s Party (NPP) bad Congress ha Arunachal Pradesh ki la pynïasoh noh sha ka seng BJP ha ka Sngi U Blei hashwa jong ka ilekshon MP Lok Sabha.
Kine ar ngut MLA jong ka seng Congress kiba la kham rangbah ki long u Ninong Ering, uba dei ruh u MP bad Myntri barim ka Sorkar Pdeng, bad u Wanglin Lowang-dong.
Katba, ar ngut ki MLA jong ka NPP kiba la phet noh sha ka seng BJP ki long u Mutchu Mithi bad u Gokar Basar.
Ïa kitei saw ngut ki MLA la pdiang sngewbha da u President ka BJP ha Arunachal Pradesh, u Biyuram Wahge, u Myntri Rangbah ka Arunachal Pradesh, u Pema Khandu, lem bad u Myntri ka sorkar Assam, u Ashok Singhal, uba dei ruh u nongpeit ïa ka seng na ka bynta ka ilekshon Lok Sabha.
Da ka jingwan pynïasoh jong kitei saw ngut ki MLA sha ka BJP, ka jingdon ki MLA ka BJP ha ka ïingdorbar thawaiñ jong ka Arunachal Pradesh ka la kiew sha ka 53 ngut. Kane ka ïingdorbar thawaiñ ka don 60 ngut ki dkhot.
Nalorkata, da ka jingphet jong kitei saw ngut ki MLA, ka seng NPP bad Congress ki sah sa tang mar ar ngut ki MLA. Ki don ruh sa lai ngut ki MLA khlem seng kiba ai jingkyrshan nabar ïa ka sorkar jong ka BJP ba la ïalam da u Pema Khandu.
Haba pdiang sngewbha ïa kitei saw ngut kiba kynthup ïa u Ering bad Lowangdong na ka Congress, bad u Mutchu Mithi (uba dei u President barim ka NPP ha Arunachal Pradesh) bad u Gokar Basar na ka NPP sha ka longïing jong ka BJP, u Khandu u la ong ba ka jingpynïasoh jong ki sha ka seng ka pyni ba ki don ka jingshaniah kaba skhem halor ki nongrim jong ka jingsynshar kaba bha jong u Myntri Rangbahduh ka Ri, u Narendra Modi.
“Ka jingpynïasoh ka jong ki sha ka seng kan nang pynkhlaiñ ïa ka BJP ha ki konstitwensi jong ki bad ha Arunachal Pradesh…. Ryngkat, ngi khmih lynti ba ngin bteng ban wanrah ïa ka jingsynshar kaba biang bad kaba ai jingmyntoi ïa ki paidbah,” la ong u Khandu.
