Chandigarh, Rymphang 25
U President jong ka seng saiñpyrthei Indian National Lok Dal ha Haryana bad u MLA barim, u Nafe Singh Rathi, u la shah siat ïap ha ka janmiet jong ka Sngi U Blei hadien ba ki briew ki bym lah ban ithuh ki la synriet kuli ïa u katba u dang don ha ka kali ha Jhajjar distrik kaba don ha ka jylla Haryana. Ryngkat bad u Rathi, ki la don sa ar ngut kiba la khlad katba ar ngut sa kiwei pat, ki la mynsaw jur.
Katkum ki khubor, u Rathi bad kitei kiba la shah siat ïap bad mynsaw jur ki la don hapoh ka kali ha ka por ba ki runar ki bym lah ban ithuh ki la wan bad synreit kuli ïa ki. Mar ïa dep synreit kuli, kita ki runar ki la phet krad.
Ïa kiba la mynsaw la pynkit noh mar-mar sha ka Brahm Shakti Sanjivani Hospital ban ïoh ïa ka jingsumar, hynrei ki doktor ki la pynbna ba utei u MLA barim u la dep khlad lypa.
Na ka liang u Rakesh Sihag, uba dei u khlieh duh ka Media Cell jong ka INLD, u la pynthikna ba u Nafe Singh Rathi u la khlad ha katei ka jingshah siat kuli.
Na ka liang ki pulit ki la sdang ban pynlong ïa ka jingtohkit bad ka jingthwet kaba jur hadien ba utei u MLA barim u la shah siat ïap. Ki la don bun bah ki kynhun pulit kiba la wan sha katei ka jaka ba la jia ka jingshah siat ban lum ïa ki sabut. Nalorkata, ki pulit ki dang peit ïa ki dur khih ba la ïoh ring lyngba ki kor CCTV ha katei ka jaka bad ki jaka ba marjan ban sngewthuh ïa ka jingïaid lynti jong ki nongsiat ïap ïa utei u heh ka seng saiñpyrthei INLD.
Ki khubor ki la pyntip ba ka don ka jingsuba jur ba ki briew jong u Lawrence Bishnoi bad u paralok uba ïajan bad u, u Kala Jahthedi, ki la donkti ha katei ka jingjia. Na ki jingtohkit ba dang sdang, la lap ba ka jingshah siat ïap ka dei na ka daw jong ka jingïakajia jaka-puta.
U Nafe Singh Rathi u dei u ‘riew saiñpyrthei uba la paw bad u la shah jied kum u MLA la arsien sha ka jylla ïingdorbar thawaiñ jong ka Haryana. Nalorkata, u la ïakhun teng ruh ha ka ilekshon MP na Rohtak.
