Amlarem, Rymphang 25
U MLA ka Jowai, u Bah Wailadmiki Shylla u la ther tyngeh ïa ki MLA ka VPP ba ki jah bad ym lait ang hapoh ïingdorbar ban ïakren halor ka jingshah khynñiat u MLA ka Mawlai, Bah Brightstar-well Marbañiang ha ka jingïakhih ha Shillong.
Ïa kane, u MLA ka Jowai u la kren ha ka jingïalang ka NPP-Amlarem Block kaba la long ha ka 24 tarik Rymphang ha Amlarem ban pynithuh ïa ka kyrtong ka NPP sha ka ilekshon MP Lok Sabha na Shillong Parliamentary konstitwensi, ka Dr. M. Ampareen Lyngdoh.
“Wat shah pynbiej ha kiwei pat ki seng kumjuh ki seng thymmai khamtam ka VPP, kiba ki nongïalam jong ka, ki sngewtynnad ban ïasaid ïa ki ishu da kaba ïakhih ha surok katba hapoh ïingdorbar pat kim lait ang ka shyntur,” la ong u Bah Wailadmiki.
U la kynthoh ruh da kaba ong, “Ki nongïalam aïu kine haba dei ban ïakren hapoh dorbar ban ïatai-ïathir hynrei jah pynban.”
Shuh shuh haba kynthoh ba halor ka jingpyrshah kren Hindi u Lat hapoh ïingdorbar thawaiñ ka Jylla, u la ong, “Lehse lashai, lashisngi lada ki leit sha Parliament, lada kren Hindi u Modi ka mut kin mih na Parliament?”
U Bah Shylla u la kyntu ruh ïa ki nongtrei bad nongkyrshan ka NPP ban trei shitom bad ban pynjop donburom ïa ka Dr. Ampareen Lyngdoh namarba ka dei kaba briew kaba la ih bha bad kaba trei shitom na ka bynta ka bha ka miat u paidbah bad ka roi ka par jong ka Jylla.
