Jowai, Rymphang 25
Ka MLA ka Sutnga-Saipung konstitwensi, Kong Santa Mary Shylla ka la ong ba u MP ka Shillong Parliamentary konstitwensi, u Bah Vincent H. Pala u la long kum u Panah.
Ïa kane ka MLA ka la kren ha ka jingïalang kaba la khot da ka NPP-Amlarem Block ban pynithuh ïa ka Dr. M. Ampareen Lyngdoh kum ka kyrtong ka NPP sha ka ilekshon MP Lok Sabha na Shillong Parliamentary konstitwensi.
Ka la pynpaw ba ki 15 tylli ki snem kiba u Bah Pala u la long kum u MP, ha ka hi marwei ka sngew la kumba u dei u Panah.
Kumta ka la kyntu ïa ki paidbah ban jied MP noh da ka kmie ka ban peit ïa ki jingdonkam jong ki khun ki kti.
Shuh shuh kane ka MLA ka la kyntu ïa ki nongtrei bad nongkyrshan ka seng ba kim dei ban sngap ïa ka jingkynthoh jong kiwei ki seng ba ka NPP ka dei ka seng kaba bamsap bad kaba pyrkhat tang ïalade.
Ka Kong Santa ka la kyntu ruh ïa ki paidbah ban kyrshan ïa ka Dr. Ampareen Lyngdoh da kaba pynjop donburom ïa ka ha kane ka ilekshon MP ban wan, khnang ba kan ïoh ban bud ïa ki dienjat jong u kpa jong ka, Bah Peter G. Marbañiang (Bam Kwai ha Dwar U Blei) uba la noh synñiang shibun na ka bynta ka Jylla.
Ha kane ka jingïalang ka NPP-Amlarem Block, la ïadonlang ruh u National General Secretary ka NPP uba long ruh u Symbud Myntri Rangbah ka Jylla, Bah Sniawbhalang Dhar nalor kiwei-kiwei.
