Shillong, Rymphang 26
Ki don haduh 154 tylli ki shnong hapoh ka jylla Meghalaya ki bym pat ïoh bording ilektrik satia wat haduh mynta.
Katkum ka jubab kaba la ai da u Myntri ka tnat Bording ka jylla u Abu Taher Mondal ha ka jingkylli kaba khlem poi ne ïakren ha ki kynta kylli jingkylli ba la wanrah da u MLA ka Mawlai, la pyntip ba ki don haduh 154 tylli ki shnong hapoh ka jylla ki bym pat ïoh bording ilektrik.
Katkum ka jingkheiñ kaba la ai da u Myntri ïa ki shnong bym pat ïoh bording ha ki district, kata ha East Garo Hills ki don 10 tylli ki shnong, 4 tylli ha East Jaiñtia Hills, 4 tylli ha East Khasi Hills, 2 tylli ha Eastern West Khasi Hills, 8 tylli ha North Garo Hills, 17 tylli ha Ri-Bhoi, 50 tylli ha South Garo Hills, 3 tylli ha South West Garo Hills, 12 tylli ha South West Khasi Hills, 17 tylli ha West Garo Hills, 12 tylli ha West Jaiñtia Hills bad 15 tylli ha West Khasi Hills.
Halor ka jingkylli la hato ka sorkar ka don jingthmu ne em ban pynbiang bording sha kine ki shnong ha ki por ban wan, u Myntri ha ka jubab ba la ai u la ong, hooid, ka don ka jingthmu ban pynïoh bording sha baroh ki shnong bym pat ïoh bording lyngba kino-kino ki skhim ban wan bei tyngka da ka Sorkar Kmie.
