Shillong, Rymphang 26
Ka Kynhun Myntri jong ka Sorkar Jylla ka la ai jingmynjur ïa ka Power Policy, 2024 bad lyngba kane ka policy, ka Sorkar ka buhthong ban lah tei ïa ki projek pynmih bording hapdeng ki 8 snem bad 10 snem ban wan kiba lah ban pynmih kumba 2,700 mega watt.
Ka Kynhun Myntri ka la ai jingmynjur ïa kane ha ka jingïalang kaba la long ha ka 26 tarik u Rymphang 2024.
Haba kren sha ki lad pathai khubor, u Myntri ka tnat bording, u AT Mondal u la ïathuh ba lyngba kane ka policy, ka Sorkar Jylla kan sa shim ki sienjam ban tei ïa ki projek bording khamtam kiba shu tan um ban pynmih bording lane ‘pumped storage hydro project’ nalor ka jingpynmih bording lyngba kiwei pat ki rukom kumba da kaba den ïa ki wah, kaba tan bording na ka sngi, ka lyer bad dewïong.
U la ong ba kane ka policy ka kyrshan ban wan kiba bei pisa ban tei ïa ki projek bording bad u sngewskhem ba kine ki sa urlong ha kine ki snem ban wan.
Haba kylli kumno ka Sorkar kan leh lyngba kane ka policy khamtam haba mih ki jingpyrshah bad ym ïoh jaka ban pyntrei ïa ki projek pynmih bording, u la ong ba haba ïadei bad ki riewshimet kiba don jaka, hap ban ïakren bad pynngeit ïa ki.
U la ong ruh ka Jylla ka don ka thong ban pynlong kum ka Jylla kaba pahuh bording ilektrik ha kine ki san snem ban wan.
Na ka liang u Chairman cum Managing Director ka Meghalaya Energy Corporation Limited (MeECL), u Sanjay Goyal u pynshai shuh shuh ïa ki bynta ba kongsan jong kane ka policy, ha kaba u la ong ba hapdeng ki 8 snem bad 10 snem ban wan, ka thong ka long ban tei ïa ki projek bording kiba lah ruh ban tei lyngba ki nongbei pisa lane da kaba shu ïasnohkti lang bad ka Sorkar.
U Goyal u la ong ba lyngba ki projek kiba shu den ïa ki wah lane hydro electric project, ka thong ka long ban lah pynmih kumba 300 mega watt ha kine ki 8 haduh 10 snem ki ban sa wan, kumba 2000 mega watt na ki projek kiba shu tan um lane pumped storage hydro project, ki projek bording na u dewïong kumba 250 mega watt, ka bording da kaba tan na ka sngi hapdeng 50 haduh 100 mega watt bad ka bording na ka lyer kumba 80 mega watt.
Kumta lada kheiñ kyllum lang ïa kine baroh, ka thong ka long ban pynmih bording kumba 2,700 mega watt ha kine ki 8 bad 10 snem.
