Shillong, Rymphang 26
Ka Hynñiewtrep Youth Council (HYC), Sengkmie ha ka Lah Sngi U Blei ka la dawa na u Superintendent of Police ka East Khasi Hills ban sospon mardor ïa u ophisar pulit jong ka thanat Pynursla halor ka jingkynnoh ktah kti ïa ki nongïalam bad dkhot ka seng ha ka miet Sngi Saitjaiñ.
“Ki nongïalam ka Ri-War Mihngi Circle, ha ka miet 24 tarik mynta u bnai ki la leit sha thanat Pynursla ban ujor pyrshah ïa ki kali kiba kit mar be-aiñ ban shalan sha Bangladesh. Ha ka por ba poi ha thanat kumba 10 baje mynmiet, mar sien poi ha khyrdop jong ka thanat, uwei u ophisar pulit uba kyrteng u George Dkhar (2nd OC ka Pynursla) u la patan ïa ki nongïalam bad ki dkhot jong ka seng kiba don 7 ngut da kaba patan shuwa ïa u President, samla Lamphrang Khonglam shapoh thanat bad thap bad shoh ym tang da ka kti, hynrei u la bom ruh da ki dieng ‘lathi’ haduh ban da mynsaw ka met,” la ong u President ka seng, Bah Roy Kupar Synrem haba kren sha ki lad pathai khubor hadien ka jingïakynduh bad u SP.
U la ong ruh ba mar sien ïoh jingtip halor katei ka jingjia, na ka liang ka seng ha ka 25 tarik ka la leit sha katei ka thanat ban ïakynduh ïa u ‘Officer-in-Charge’ bad haba pyrshang ban kylli ïa ka daw hapdeng ka jingdonlang jong utei u ophisar (George Dkhar), utei u pulit ha jaka ban sngewthuh la ka jingbakla, u la pyni pynban ïa ka jingsngewmeng ba kaei kaba u leh, ka long kaba dei.
“Kumta ka seng kam banse ban ujor ïa kane ha u SP da kaba kyntu ruh ïa u (SP) ban pynshitom ïa une u ophisar namar ka jingleh jong u ka long kaba be-aiñ. Kum kine ki jait pulit lada ki don ha thanat, ha ka jaka ba ki paidbah kin sngew shngaiñ ban leit ujor sha thanat ïa kano-kano ka kam pyrshah ïa ki, kin sngewtieng pynban,” u la ong.
Utei u nongïalam u la ong ruh ba kum kine ki briew kim dei hok ban don hapoh thanat jong ka Ri-Khasi Jaiñtia bad dei ban beh ïa ki na thanat bad ban pynshitom namar ki la shim ïa ka aiñ ha la ki jong ki kti.
Haba buh jingkylli kumno utei u pulit u la tan ïa ki ‘riew paidbah hapoh thanat bad bom bad tied ïa ki, ha ryngkat ka jingmaham da ki kyntien byrngem bad ‘tien sih, u President u la ong, “Utei u pulit u la ong ruh ïa ki nongïalam jong ngi ba ma ki, kim dei ban bat ïa kiba kum kine ki kali kiba ïaid be-aiñ…ka jingmut jong u ka long ban ïarap ïa kita ki nongleh be-aiñ ne kaei ka jingmut…ne ba u donkti ha kane ka kam, na kata ka daw um kwah ba ki paidbah ne sengbhalang kin lap ïa kiba kum kine ki kam.”
U Bah Synrem haba pynsngew ba ka seng ka la dawa ban sospon mardor ïa utei u pulit, u la ong, “U SP u la kular ba un sa leh ïa kaba donkam bad un sa pyntip ruh sha ngi na ka por sha ka por kaei kaba u la leh halor kane ka ujor.”
Shuh shuh u la ong ba ka seng kan sa phah jingthoh ruh sha ka shlem treikam jong ka Meghalaya Human Rights Commission (MHRC) ban dawa shim khia halor katei ka jingjia.
“Ngim ong ba baroh ki pulit ki long kumjuh, ka jingdon uwei ne ar ngut kum une u briew ka pynthohbria ïa ka tnat pulit baroh kawei. Ngin phah kopi ruh sha u DGP ban pynshitom ïa u khnang ba kan ym long ka jingthohbria ïa ka tnat,” u la ong.
Nalor kane u la bynrap ba lada ki bor ba dei khmih kim ai ïa ka jingbishar kaba hok, ka seng kan leit sha ki bor ba halor.
