Shillong, Rymphang 26
U MLA ka VPP na North-Shillong, Bah Adelbert Nongrum haba ai jingkren hapoh ïingdorbar thawaiñ ha ka Lah Sngi U Blei u la pynpaw ka jingsngewkhia halor ka jingrem jong ka bai skul ha ki skul shimet, ha kawei ka liang kaba la ktah shi kat dei ïa ki kmie ki kpa jong ki khynnah.
“Nga sngew ba ka tnat pule-puthi ka la shu jied haba ïadei bad ki jingbthah kiba dei ban buh ha ka jingpynbna, katba ka sngap jar halor ka mat kaba ktah ïa ki kmie ki kpa bad ki bahaïing-bahasem kiba phah skul ïa la ki jong ki khun ki kti bad kata ka mat ka dei halor ka bai skul,” la ong u Bah Nongrum haba kren halor ka jingpynbna ba dang shen jong ka tnat pule-puthi kaba u la wanrah lyngba ka ‘Call Attention’.
Haba kdew ba ka jingrem jong ka bai skul ha ka shi bnai ha ki skul shimet ka la buh jingeh shi kat dei ïa ki kmie ki kpa bad ki bahaïing-bahasem, u la ong, “Ka bai skul na bynta baroh shi snem kaba hap siew haba sdang jong u snem, kaba long kumno-kumno hynriew shah ïa kaei kaba siew ha ka shi bnai, ka long kumba hap siew shuh sa shiteng snem jong ka jingsiew ba man u bnai.”
U MLA u la ïathuh ruh ba ka don ka jingbitar na u paidbah halor ka jingrem jong ka bai skul ba man u snem, naba ki bor pynïaid skul kim shym la batai shai halor ka nongrim jong ka jingrem ka bai skul.
Ha kajuh ka por, haba pynsngew ba bun na ki skul shimet kiba ju shim ïa ka bai skul ba man u snem ki ju ïoh pdiang ïa ka jingïarap pisa na ka Sorkar, u Bah Nongrum u la buh jingkylli ba kumno pat ka tnat pule-puthi ka khapbrib shiliang khmat halor ka jingrem ka bai skul ba man u bnai kaba la oh da ki skul shimet.
“Balei ka tnat kam lah ban pynbeit ryntih haba ïadei bad ka jingrem jong ka bai skul ba man u snem kaba la oh da ki skul shimet, ha kajuh ka por, kiba ïoh jingïarap na ka Sorkar,” u la buh jingkylli.
U la ong ba ka jingpynbeit ryntih ïa ka bai skul ka dei ban long katkum ka jingïapyrkhat lang da kaba ai nuksa ba ka bai khreh kot ba man u bnai bad ka jingpynkiew bai skul ba man u snem dei ban pynbeit hadien ka jingmynjur lang jong ki kmie ki kpa bad ki nonghikai.
Haba ban biang ba ka dei ban don ka jingpynbeit ryntih haba ïadei bad kane ka bynta khnang ban khang ïa ki skul shimet ban pynkiew bai skul katba mon, u Bah Nongrum u la bynrap, “Ki skul shimet kim dei ka kam khaïi ban ïohnong bad lada ki leh kumta, kata ki ïaid lait na ka kyndon 11 jong ka Meghalaya Right of Children to Free and Compulsory Education Rules, 2011.”
Na ka liang u Myntri ka tnat pule-puthi, u Rakkam A. Sangma haba jubab ïa katei ka bynta u la ong ba kane ka dei ka mat ha kaba bun ki kmie ki kpa lem bad ki khynnah ki la wan ban pynsngew sha u.
“Nga kwah ban pyntikna ba ban khmih bniah bad ai jingmut ïa kane, ka Sorkar ka la thaw ïa ka Meghalaya State Education Commission bad ka dang khmih bniah ïa kine kiei-kiei baroh,” la ong u Sangma.
U la ong ruh ba ka jingkhmih bniah kam dei tang ha ka kyrdan jong ki skul, hynrei ïa kiwei-kiwei ki shlem ai jinghikai la ka long ha ki kyrdan pule ba shajrong, kolej, skulbah, naba la sakhi ïa ka jingïapher ha ka jinglong-jingman jong ka rukom siew.
Shuh shuh u la ong, “Nga kwah ban kular ba ïa ka jingkdew bad jingai jingmut jong u MLA, nga la shimkhia bad ka tnat pule-puthi lem bad ka Sorkar Jylla ngin sa khmih bniah bad yn thaw ïa ka komiti ban khmih bniah halor kane ka bynta. Ngi dang ap ruh ïa ka jingai jingmut na ka liang ka Commission halor kane.”
Na ka liang u Myntri u la pyntikna biang sa shisien ba ka tnat kan sa khmih bniah ïa kane ka mat khamtam ïa kito ki skul kiba la ai jingkyrshan da ka Sorkar.
