Shillong, Rymphang 26
Kum shi bynta ban ïakhun ïa ka jingeh ha ka ïoh kam ïoh jam, ka Sorkar Jylla ka la wad bun ki lad ki lynti ban ïakhun pyrshah halor kane ka mat da kaba wanrah ïa ki prokram ne skhim bapher bapher.
Ïa kane la pyntip da u Myntri Rangbah ka Jylla u Conrad K Sangma hapoh ka ïingdorbar haba jubab ïa ka jingkylli ba la wanrah da u MLA ka Nongstoiñ u Bah Gabriel Wahlang ha ki kynta kylli jingkylli ha ka Lah Sngi U Blei.
U Myntri Rangbah u la pyntip ba ka sorkar jylla ka la lah ban pynkha haduh 2.3 lak tylli ki kam tang ha kine ki lai snem ba la leit noh bad ka don jingthmu ban pynkha sa 1 lak tylli ha kine shisnem ban wan.
U Conrad u la pyntip ba ki prokram bad ki skhim bapher bapher kiba ka Sorkar Jylla ka la pyntreikam ban plie lad ïa ka ïoh kam ïoh jam ïa ki nongshong shnong ki long kum ka skhim MGNREGS, CM-Elevate, PRIME Program, FOCUS, FOCUS+, ki Mission ha ka rep ka riang, ka Meghalaya Grassroot Music Project, Chief Minister’s Youth Centre, National Rural Livelihood Mission bad ka Skill Meghalaya.
Shuh shuh haba jubab ïa ka jingkylli bynrap ïa ka jingdon kiba khlem kam ha ka jylla, u Myntri Rangbah u la ong ba ka jingdon kiba khlem kam ha Meghalaya ka long 3% katba duna haba ïanujor bad ka Ri baroh kawei kaba kot sha ka 4.7%.
U la pyntip ba ha kine ki lai snem ba la leit, ka jingai kam lyngba kine ki prokram bapher bapher ka la kot haduh 2.34 lak tylli. Nangta ha kine ki san snem ban wan ka thong ka long ban pynïoh kam 5.5 lak ngut bad kumta lada shu kheiñ malu-mala, yn lah ban ai kam kumba 1 lak ha u snem ban wan.
U Myntri Rangbah u la pyntip ruh ba ha kaba ïadei bad ka kam sorkar, ha kine ki lai snem la lah ban thung kam 3000 ngut. Kine ki kynthup ïa 500 tylli ki kam doktor bad 30 tylli ki nos bad technical staff la dep ban thung hapoh ka tnat ka Koit ka Khiah, 1000 tylli ha ka tnat Pulit bad 1000 tylli ha ka kam nonghikai.
Nalor kata, u la ong ba wat ha ki District ruh la pynkha kam hynrei ym don jingkheiñ. U la ong ruh ba na ka 5.5 lak ngut kiba ka sorkar kan ai kam ha kine ki san snem ban wan, ka sorkar ka la buh thong ba 2.5 lak ngut kan long tang ha ka kam rep, shi lak na ka bynta ki kynthei na ka skhim NRLM, na ka Skill Meghalaya yn pynïoh 1.2 lak ngut, na ka tnat Kam Jngohkai kan long 50,000 ngut, na ka CM-Elevate 50,000 tylli ki kali, bad ka IT kan pynkha 20,000 ki kam. Sa 10,000 tylli ki kam kin long ha ki prokram bapher bapher ka Sorkar.
Haba ïadei bad ka jingthungkam da ki District Selection Committee (DSC), u Myntri Rangbah u la ong ba kam long satia kaba shisha ba ki DSC kim shym la khot thep kam namar ki la pynïaid beit ïa ka jingthung kam wat la kam dei eh kaba bun.
