Nongstoiñ, Rymphang 26
Na ki 6.335 km ki surok kiba pynïasoh sha ka shnong Nongkhlaw ha West Khasi Hills kiba dei ruh ki surok kiba la shna thymmai kynthup ruh ban siang rong na ka bynta ka jingwan jong ka jingïaseng Synod Samla ha u snem 2023 ha Nongkhlaw, tang kumba 2 km tam la lap ba la lah ban pyntrei dep. Lait nangta ki bun pat kiba la shu sah khongreng khlem da leh eiei shuh ha kaba kane ka la long shisha ka jingduh-nong kaba khraw ïa ki paid nongshong shnong jong ka thaiñ.
Ïa kane la lap da ka Federation of Khasi Jaiñtia & Garo People (FKJGP) Lai Lyngdoh Area Unit ha ka jingdonlang ruh ki nongkitkam na ka FKJGP Nongstoiñ Circle bad West Khasi Hills District, ki nongïalam shnong ka thaiñ hadien ba ka FKJGP ka la pynlong ïa ka jingjurip ha ka Lah Sngi U Blei jong ka taïew.
U President ka FKJGP Lai Lyngdoh Area Unit, Bah Nestor Nongkseh, haba kren sha ki lad pathai khubor u la ong ba ka jingwan jurip jong ka seng ïa kitei surok ka dei hadien ba ka seng ka la ïoh ruh ïa ka RTI. Ha ka jingjurip la lap ba bun na ki surok ki la shu sah khongreng naba ki kontraktor kiba ïoh ban pyntrei ki la shu ieh noh kumto.
Shuh shuh u la ong ruh ba ka FKJGP ka kyntu jur ïa ka tnat PWD bad kumjuh ïa ki kontraktor ba ki dei ban shim khia mardor ban pyndep noh ïa ka jingsiang rong khnang ba kan long ka jingmyntoi ïa ki paidbah.
Ha kajuh ka por u la ong ba ka seng shen kan sa leit ruh ban ïakynduh ïa u Executive Engineer ka tnat PWD Nongstoiñ ban ïakren halor katei ka bynta.
Katba, u Sordar ka shnong Nonglwai II, Bah George Kharbani, u la pynpaw ïa ka jingbitar kaba jur halor ka jingbym kheiñ snep jong ka tnat PWD kumjuh ki kontraktor kiba ïoh ban pyntrei ïa ka surok ha kaba tang hadien ba la kut ka Synod, kitei ki surok baroh ki la shu shah ieh khongreng.
Nalor nangta, u la buh jingkylli ruh ïa ka sorkar lyngba ka tnat PWD, hato kitei ki surok ki dei beit ba la pyntrei tang na ka bynta ka Synod ne ban myntoi lang ki paid nongshong shnong? Lada ka dei tang na ka bynta ka Synod, ka tnat PWD bad ka sorkar ka dei ban pynphai noh ïa ki ‘land give deed’ sha baroh ki trai khyndew khnang ba kin ïoh ban pyndonkam noh ïa la ki jong ki jaka.
