Shillong, Rymphang 26
Ka Meghalaya State AIDS Control Society (MACS) kan sa pynlong ïa ka ‘Red Fest’ ha ka sien basan lyngba ka Northeast Multimedia Campaign halor ka phang ‘Northeast United Against HIV/AIDS’ ka ban sa long ha ka 28 tarik u Rymphang, 2024 hapoh ka LARITI Performing Centre kaba don ha Mawkasiang, New Shillong ka ban sdang naduh ka por 10 baje mynstep.
Haba kren sha ki lad pathai khubor ha ka Lah Sngi U Blei jong ka 26 tarik u Rymphang 2024, ki nongïalam ba hakhmat jong ka ‘Red Fest’ ki la ïathuh ba ha kane ka tamasa yn sa don kumba 2,500 ngut ki nongïashim bynta kiba kynthup ruh ïa ki heh ophisar jong ki tnad treikam bapher-bapher ka sorkar jylla.
Na ka liang ka Project Director jong ka MACS, ka Dr B. Decruse ha ryngkat bad u Bah Ajoy M. Lanong uba dei u Deputy Director (Mainstreaming), ki la ïathuh ba ha kane ka ‘Red Fest’ kin don haduh kumba 126 tylli ki distrik hapoh ka thaiñ shatei lam mihngi ki ban wan ïashimbynta ha ryngkat ki kynhun tem bapher-bapher kiba napoh ka jylla bad nabar ruh kumjuh.
Ka Dr. Decruse ka la ong ba ki distrik kiba kham jur ka jingshah ktah ha une u khniang jingpang ki dei ka East Jaiñtia Hills bad ka West Jaiñtia Hills. Nangta, ka la ïathuh ruh ba mynta ka la don ka jingkiew jong kiba ïoh ïa une u khniang jingpang wat hapoh East Khasi Hills, Ri-Bhoi bad ha West Khasi Hills ruh kumjuh.
“Ka jingjur jong ka jingïoh ïa une u khniang jingpang ka dei lyngba ka jingïashongkha khleh ha Rilum Jaiñtia bad wat ha kiwei-kiwei ki bynta jong ka jylla ruh ka dei lyngba ka jingshongkha khleh, lada ngi phai sha ki jaka nongkyndong, ka jingjur ka jingïoh ïa u khniang jingpang ka dei lyngba ka jingshongkha khleh hynrei lada ngi phai pat sha ki jaka sor, ka dei lyngba ka jingpyndonkam ïa ki thyrnia ban dih ïa u drok”, la ong ka Dr. B. Decruse.
Ka jingthmu jong ka ‘Red Fest’ ka long ban ai mynsiem bad pynshlur ïa ki briew kiba ïakhun thma pyrshah ïa ka jingpang HIV/AIDS lyngba ki jingrwai bad ka tem ka put namar ki sur jingrwai ki long ka atiar kiba lah ban wanrah ka jingmyntoi ïa ki khynnah samla ba kin jied ïa ka lynti kaba bha bad ba kin im ka jingim kaba thymmai.
U Bah Lanong u la ong lyngba katei ka Northeast Multimedia Campaign kan long ruh kum ka jinghikai ban kiar na ka shongkha khleh khlem kino-kino ki jingïada bad kumjuh ruh ban hikai naba ibeiñ ïa kiwei pat kiba mad ïa une u khniang jingpang.
U Bah Lanong u la ïathuh ruh ba napdeng ki jylla shatei lam mihngi ka ri, ka jylla kaba bun tam kiba ïoh ïa une u khniang jingpang ka dei ka jylla Mizoram kaba long 2.34%.
