Shillong, Rymphang 26
Ka sorkar jylla lyngba ka tnat General Administration Department (GAD) ka la sdang ban wad jaka na ka bynta ban tei ïa ka Meghalaya House ha ka jylla Karnataka.
Ha ka byrta (Expression of Interest) ba la pynmih da ka tnat, la ong ba ka tnat ka kwah ban thied jaka kaba don hapdeng 5,000 haduh 8,000 square metre ha Bangalore Urban District, Karnataka ban shna ïa ka ‘Meghalaya State House’.
Namarkata, ka tnat ka la khot la wer ïa ki trai jaka ba kin wan shakhmat ban tyrwa ïa ka khyndew kaba biang bad kaba long katkum ki kyndon ba la buh ha ka EOI.
Kumba ka long mynta, ka tnat GAD ka don ïa ki Meghalaya House ha New Delhi, Kolkata, Mumbai, Vellore bad Guwahati.
Hynrei naduh ki snem kiba mynshwa, ki la don ki jingdawa ban tei ïa ka Meghalaya House ha Bangalore namar ka jingbun ki briew na kane ka jylla kiba pule bad kiba trei ha Karnataka nalor kiba leit ba wan sha katei ka jylla.
Katto-katne ki kyndon na ka bynta ki trai jaka ki long ba ka khyndew ka dei ban lait surok, ka khyndew kam dei ban don hapoh u pud u sam jong ki jaka ba la mana la ki dei jong ka Wildlife lane Forest ne shipai bad kam dei ban doh hapoh ki National Park.
Ha kajuh ka por ka khyndew ka dei ban don hajan jong ka Kempegowda International Airport, bad ka tnat GAD kan peit bha ïa ka jingjngai hapdeng ka khyndew bad ka kad liengsuiñ ha ka por ba ka bishar ïa ki jingtyrwa ki trai jaka.
