Shillong, Rymphang 26
Ka tnat pulit jong ka jylla hapoh ka jingïalam jong u Director General of Police (DGP), u Dr LR Bishnoi ha ka Lah Sngi U Blei ki la pynlong da ka jingïakynduh lang jong ki samla pule ka St Anthony’s College ban pynshai halor ka jingma bad ka jingsniew lada pyndonkam bad dih ïa u drok.
Haba ai jingkren sha ki samla pule ha katei ka sngi, u DGP u la ïathuh ba ki pulit jong ka jylla ki la trei shitom ban pynduh jait ïa une u jingdih basniew bad uba kham palat ban ïa ka khlam Corona Virus ne u Covid-19 halor ka jingsaphriang sted.
U la ong ruh ba ka jylla Meghalaya ka dei ka jylla kaba don hajan bad ka Golden Triangle, bad une u jingdih u rung sha ka ri Meghalaya na ki ri ba marjan kata ka Myanmar lyngba ka jylla Manipur bad kiwei ki jylla kiba marjan.
U Dr Bishnoi u la ïathuh ruh ba la jan baroh ki ri ka pyrthei ki la shah lynshop ha une u jingdih pynbuaid bad ka dei tang ka Vatican City kaba lait na une u jingdih basniew ha kaba um pat ïohlad satia ban rung.
Shuh shuh u la ïathuh ruh ba ka tnad pulit jong ka jylla Meghalaya ka la trei shitom haduh katta-katta khlem shongthait ban ïakhun bad ban pynduh jait ïa une u jingdih bad da ki spah ngut ki briew kiba la donkti ban die bad pynïaid ïew ïa une u jingdih, ka tnad pulit ka la ïoh ban kem ïa ki.
“Ngi la ïakhun thma pyrshah bad u drok ha kaba ha ka shisnem shiteng, ngi la ïoh ban kem 640 ngut kiba la donkti ban khaïi bad pynïaid ïew ïa u drok bad ngi la ïoh kurup 24 kilo u Heroine, 10 kilo u Marijuana, 15 kilo u Crystal Meth uba long u drok ba shyrkhei bha bad kiwei-kiwei ki kynja drok kiba ngi la ïoh ban kurup”, la ong u Dr. Bishnoi.
U la ïathuh ruh ba ka tnad pulit ka la ïoh ban kurup noh kumba 300 tylli ki kali kiba la pyndonkam da ki nongkhaïi ban pynïaid ïew ïa u drok ha ryngkat 600 tylli ki mobile phone.
Ha katei ka sngi ka la don ruh ka jingkilan met kaba la pyni da ki pulit SF-10 sha ki samla pule jong ka St. Anthony’s College.
