Shillong, Rymphang 26
U Myntri ka tnat Civil Defence & Home Guards, Bah Comingone Ymbon, u la pyntip ba ka Home Guard ka dei ka kynhun treimon sngewbha ne ka Voluntary Organisation bad ka jingai kam ïa ki, ka long tang haba donkam, bad kumta ym lah ban thungkam pura ïa ki.
U Myntri u la pyntip ïa kane haba jubab halor ka jingkylli kaba la wanrah da u MLA ka Nongkrem u Bah Ardent M Basaïawmoit ha ka Lah Sngi U Blei ha ki kynta kylli jingkylli hapoh ka ïingdorbar.
Haba jubab ïa ka jingkylli, u Myntri u la ong ba ka jingthung kam ba la kot bun snem kam ai satia ïa ka hok ki Home Guard ba kin bat sah ïa ka kam bad ai ïa kano-kano ka hok halor ka jingthung kam ba shipor ne shirta bad ki agency ba thung ïa ki.
U la ong ba ki Home Guard wat la ki la trei slem kim don ïa ka hok ban shah thung kam pura ne ban ithuh noh ïa ka jingtrei jong ki kum ki nongtrei ba pura. Ka tnat Civil Defence & Home Guard ka dei tang ka Agency ne ka nongpynbiang briew na ka bynta ki kynhun bapher bapher kiba donkam ïa ka jingshakri jong ki.
U Myntri u la pyntip ruh ba ka kamram ban siew tulop ne kiwei ki jingsiew sha ki Home Guard Volunteer ruh ka shong ha ki Agency ba aikam ïa ki, bad bynrap ba baroh ki kam ba ïadei bad ka jingshakri jong kine ki volunteer kum ka jingpynsangeh aikam noh ïa ki, ka jingthungkam biang, bad kiwei kiwei, ka shong ha ka bor jong ki agency kiba siew ïa ki jingsiew baroh.
U Myntri u la ong ba ka tnat ka la pyrshang ban wad ïa ki lad ki lynti kumno ban leh eiei halor ki jingud jingnam jong ki Home Guard.
Haba ïadei bad ka jingpynslem ban siew ïa ka bai nong jong ki, ka long ba kam don ka jingmang pisa ha ka mang tynkga hynrei ka sorkar ka shim ban siew ïa ki da kaba pan pisa ha ki rukom bapher bapher kaba ka sorkar ka don.
