Shillong, Rymphang 26
U Myntri Rangbah ka Jylla, u Conrad K. Sangma ha ka Lah Sngi U Blei u la pynshai ba ka Sorkar ka la kyntiew ïa ka rta ban thep kam khatduh (Upper Age Limit) ha baroh ki tnat treikam Sorkar lait noh ha ka tnat pulit, Excise Registration Taxation & Stamps, Homeguards & Civil Defence bad Forest & Environment.
U Sangma u la pynshai ïa katei ka bynta haba jubab ïa ka jingïatai ba lyngkot ba la wanrah da u MLA ka Mawlai, Bah Brightstarwell Marba- niang halor ka jingmynjur jong ka Kynhun Myntri ka Sorkar ïa ka rta na bynta ki kam bapher-bapher ha ki tnat treikam Sorkar kaba la mih ha kawei na ki lad pathai khubor.
“Ka Sorkar lyngba ka ‘Office Memorandum’ (OM) ka tnat Personnel (AR) ha ka 3 tarik Rymphang, 2022, ka la pynbna ban kyntiew ïa ka rta ban thep kam khatduh na ka 27 sha ka 32 snem nalor ka jingpynjynsur kaba 5 snem na bynta ki kyrtong kiba hap ha ka thup ST bad SC,” la ong u Myntri Rangbah hapoh ïingdorbar thawaiñ.
U la ong ba katei ka OM ka kdew ruh ba ka rta thep kam ba khatduh kaba thymmai kan treikam ha baroh ki jait kam lait noh ha katto-katne ki jait kam kumba la pynbna da ka tnat Personnel (AR) na bynta ka tnat pulit, Excise Registration Taxation & Stamps, Homeguards & Civil Defence, tnat Along bad Khlaw & Mariang.
Halor katei ka hukum, kitei 4 tylli ki tnat treikam ki la kyrpad ïa ka Sorkar ban buh da kawei ka rta ban sdang thep kam bad ka rta ban thep kam khatduh haba ïadei bad ka jingrung kam sha ki tnat treikam ka Sorkar.
“Kumta na bynta baroh kiwei-kiwei ki tnat treikam, ïa ka rta ban sdang thep kam ym shym la kyntiew, katba ïa ka rta ban thep kam khatduh, la rah na ka 27 sha ka 32 snem na bynta baroh kiwei-kiwei ki tnat treikam khnang ba bun ngut ki lah ban thep kam. Ha ryngkat ka jingpynjlan kaba 5 snem, kata haduh 37 snem na bynta baroh kiwei-kiwei ki tnat treikam lait noh ha kine 4 tylli ki tnat treikam,” u la ong.
U Myntri Rangbah u la ong ruh ba katkum ka jingpynbna na ka tnat Personnel, lyngba ki jingai jingmut na kitei 4 tylli ki tnat treikam, ïa ka rta ban sdang thep kam bad ka rta ban thep kam khatduh kin ym kylla hynrei kin neh kumjuh.
“Ki kyrdan kam kum ka Inspector of Excise, Forest Guard, ophisar MPS bad kiwei-kiwei ki donkam ïa ki kyrtong kiba hap ban pyndep ïa katto-katne ki jingkilan met ba kyrpang namar ka jinglong-jingman jong ka kam kaba dawa ïa ka bor met,” u la ong.
U la ïathuh ba na bynta ki pulit, kham ha shuwa ka rta thung kam na bynta ki AB Constable, ka rta ban sdang thep kam ka long 18 snem katba ka rta ban thep kam khatduh ka long 21 snem, bad mynta ruh kane ka neh kumjuh namar ka jingdawa jong ka kam – ban long kiba bit kiba biang ha ka met ka phad.
Shuh shuh u Sangma u la bynrap ba ka Sorkar kam pat lah ban pynmih ïa ka jingpynbna ba khatduh haba ïadei bad ki rta thep kam namar ka dang khmih bniah ïa kane ka bynta bad kumta hap ban pynleit jingmut khnang ba kan ym don kano-kano ka jingkulmar jingmut.
“Na bynta baroh kiwei-kiwei ki tnat treikam, ka rta thep kam ba khatduh, la rah na ka 27 sha ka 32 katba ki kam kiba dawa ïa ka bor met khamtam ha kine 4 tylli ki tnat treikam (ym baroh ki kam), hynrei katkum ki jait kam ba la kdew da kine ki tnat treikam na ka por sha ka por, ïa ka rta kaba la don naduh mynshuwa, kan neh kumjuh bad kan ym kylla,” u la ong.
