New Delhi, Rymphang 27
Ha kawei ka jingjia ka bym ju kham jia koit ha ka ilekshon MP Rajya Sabha, u kyrtong ka BJP na ka jylla Himachal Pradesh u la jop pyrshah ïa u kyrtong ka seng Congress da kaba shu pynkhalai nusib hadien ba ki la ïoh mar katjuh ki ‘vote’.
Une u kyrtong ka BJP uba la jop u dei u Harsh Mahajan katba u kyrtong ka Congress uba la shah rem u dei u Abhishek Manu Singhvi. Ha ka ilekshon MP Rajya Sabha, dei ki MLA kiba long kum ki nongthep ‘vote’.
Ha ka Ïingdorbar Thawaiñ kaba don 68 ngut ki MLA, ka Congress ka don haduh 40 ngut katba ka BJP tang 25 ngut bad ki MLA khlem seng ki don 3 ngut.
Ka jingpoi mar katjuh ki ‘vote’ jong kitei ar ngut ki kyrtong ka long hadien ba hynriew ngut ki MLA ka Congress ki la shet kylla ïa la ka jong ka seng wat la kane ka seng ka dei kaba bat ïa ka bor synshar ha Himachal Pradesh. Kine ki hynriew ngut ryngkat bad lai ngut ki MLA khlem seng (Independent) ki la leit ai jingkyrshan ïa u kyrtong ka BJP.
Ha ka jingshisha, ka jingkhmih lynti ka long ba u Singhvi un jop da kaba suk namar ka Congress ka don haduh 40 ngut ki MLA. Hynrei ynda la ñiew ïa ki ‘vote’, la shem ba hynriew ngut ki MLA ka Congress lem bad lai ngut ki MLA khlem seng ki la leit ai jingkyrshan ïa u kyrtong ka BJP bad namarkata, u kyrtong ka BJP bad Congress ki la ïoh mar 34 ‘vote’.
Haba kren hadien ka jingpynbna ïa u nongjop, u Singhvi u la ong, “Kano-kano ka seng kaba pynïeng kyrtong haba ka don tang 25 ngut ki MLA katba ka sorkar ka don 43 ngut ki MLA ka ai tang ïa kawei ka khubor bad kata ka long ba ki la thmu ban leh eiei kaba long be-aiñ. Ngam kren tang halor u Mahajan ne ïa kane ka ilekshon, hynrei nga kren halor ka nongrim baroh kawei.”
