Shillong, Rymphang 27
U MLA ka TMC, Dr. Mukul Sangma ha ka Sngi Ba-ar u la dawa da ka jingtohkit halor ka jingshah kynnoh ktah kti ki dkhot ka HYC ha u ophisar pulit jong ka thanat Pynursla ha ka miet 24 tarik mynta u bnai.
U Dr. Sangma haba shim bynta hapoh ïingdorbar thawaiñ ha ka jingïakren halor ka Mang Tyngka u la ong ba u la ïoh pdiang ïa ka jingpynsngew na ka HYC haba ïadei bad kawei ka jingjia ha kaba ki dkhot jong ka seng ki la pyrshang ban leit ujor sha ki pulit ka thanat Pynursla halor ka jingshalan tuh ïa ki muid.
“Bad la jia aïu, ka long kaba pynkyndit, ha ka jaka ba ki pulit kin leh eiei halor ka jingujor, ki la sah ktah kti pynban. Nga kwah ïa ka jingtohkit halor kane. Kumno ka lah ban long ba ki nongshong shnong kiba long ki nongwanrah khubor ki la shah leh pynban ha kane ka rukom,” la ong u Dr. Sangma da kaba bynrap ba ka don kaei-re-kaei kaba bakla kaba la jïa.
Ka Hynñiewtrep Youth Council (HYC), Sengkmie ha ka Lah Sngi U Blei ka la dawa na u Superintendent of Police ka East Khasi Hills ban sospon mardor ïa u ophisar pulit ka thanat Pynrusla halor ka jingkynnoh ktah kti ïa ki nongïalam bad dkhot ka seng ha ka miet Sngi Saitjaiñ.
U President ka seng, Bah Roy Kupar Synrem u la ïathuh ba ki nongïalam ka Ri-War Mihngi Circle, ha ka miet 24 tarik mynta u bnai ki la leit sha thanat Pynrusla ban ujor pyrshah ïa ki kali kiba kit mar be-aiñ ban shalan sha Bangladesh.
U la ïathuh ruh ba ha ka por ba poi ha thanat kumba 10 baje mynmiet, mar sien poi ha khyrdop jong ka thanat, uwei u ophisar pulit uba kyrteng u George Dkhar (2nd OC ka Pynursla) u la patan ïa ki nongïalam bad ki dkhot jong ka seng kiba don 7 ngut da kaba patan shuwa ïa u President, samla Lamphrang Khonglam shapoh thanat bad thap bad shoh ym tang da ka kti, hynrei u la bom ruh da ki dieng ‘lathi’ haduh ban da mynsaw ka met.
Nalor kane, u la ong ba mar sien ïoh jingtip halor katei ka jingjia, na ka liang ka seng ha ka 25 tarik ka la leit sha katei ka thanat ban ïakynduh ïa u ‘Officer-in-Charge’ bad haba pyrshang ban kylli ïa ka daw hapdeng ka jingdonlang jong utei u ophisar (George Dkhar), utei u pulit ha jaka ban sngewthuh la ka jingbakla, u la pyni pynban ïa ka jingsngew meng ba kaei kaba u leh, ka long kaba dei.
Shuh shuh u la bynrap ba ka seng kan sa phah jingthoh sha ka ophis treikam ka Meghalaya Human Rights Commission (MHRC) ban dawa shimkhia halor katei ka jingjia.
