Shillong, Rymphang 27
Ki nongdie madan kiba shong die jingdie harud surok hapoh u pud u sam jong ka Shillong Municipal Board ha nongbah Shillong ki don haduh 1400 ngut.
Ïa kane la pyntip da u Symbud Myntri Rangbah ka jylla u Bah Sniawbhalang Dhar uba khmih ruh ïa ka tnat Pynroi Sor ha ka jubab ba la ai ha ka jingkylli kaba la wanrah da u MLA ka North Shillong u Bah Adelbert Nongrum ha ka ‘starred question’ kaba khlem poi ban ïatai hapoh ka ïingdorbar namar ka jingkut noh ka por kylli jingkylli.
U Bah Sniawbhalang u la pyntip ba napdeng kine ki 1400 ngut kiba shongdie jingdie harud surok haduh 432 ngut ki dei kiba dei jingdie ha Khyndailad, 142 ngut ha Jail Road, 37 ngut ha Polo, 66 ngut ha Civil Hospital bad thaiñ Barik, 563 ngut ha Motphran, 135 ngut ha Laitumkhrah bad 25 ngut ha Laban.
Halor ka jingkylli, la ka don ne em ka jingjurip ïa ki nongdie madan katkum ki kyndon jong ka Street Vendors (Protection of Livelihood and Regulation of Street Vending) Act, 2014, u Symbud Myntri Rangbah u la pyntip ba ka la don ka jingjurip ïa ki nongdie madan, kata ba la leh naduh ka 4 tarik Nohprah, 2023 haduh 16 tarik Kyllalyngkot, 2024.
Haba kylli mynno la thaw ïa ka Town Vending Committee na ka bynta ka nongbah Shillong, la jubab ba ïa ka Town Vending Committee la thaw ha ka 13 tarik Risaw, 2022 katkum ka Notification No. UAU.5/2017/Pt.IV/18.
Ki kyrteng jong ki dkhot jong ka Town Vending Committee ba mynta ki long Chairperson dei u Chief Executive Officer ka Shillong Municipal Board, Member Secretary yn dei kiba mihkhmat na ka shlem treikam Deputy Commissioner, East Khasi Hills ki bym duna ïa ka kyrdan Additional Deputy Commissioner katba kiwei ki dkhot ki long ki ban mihkhmat na ki pulit bym duna ïa ka kyrdan Assistant Superintendent of Police, na ka Traffic Police, na ka ophis DMHO, na ka MUDA, na ka KHADC, ar ngut ki nongmihkhmat na ka Shillong Roadside Hawkers Association, 3 ngut ki nongmihkhmat na ka Meghalaya & Greater Shillong Progressive Street Vendors & Hawkers Association, ar ngut na ka Greater Ïew Polo Welfare Association, na ka KSU Sengkmie, na ka Synjuk ki Rangbah Shnong bad Lead District Manager ka East Khasi Hills.
