Shillong, Rymphang 27
U Myntri ba khmih ïa ka tnat Revenue & Disaster Management, Bah Kyrmen Shylla, u la pyntip ba ki don haduh 2426 ngut ba kynthup ïa ki ‘riewshimet, ki kynhun kiba la ïoh ïa ka jaka sorkar ne ka revenue land.
U Myntri u la pyntip ïa kane haba jubab halor ka jingkylli kaba la wanrah da u MLA ka Nongkrem u Bah Ardent M Basaïawmoit ha ki kynta kylli jingkylli hapoh ka ïingdorbar ha ka Sngi Ba-ar.
Halor ka jingkylli kaba la buh da une u MLA na Nongkrem ba haduh katno ngut ki briew na Bangladesh ki la die noh ïa ki jaka ha Rynjah ne RR Colony ba la ai sha ki ha ka por ba don ka thma Laitluid u snem 1971, u Myntri u la ong ba ïa kane la leh katkum ka Assam Land Regulation Act 1886, la ong ba ka sorkar ka ai ïa ki jaka katkum ka jingbiang ki kot ki sla bad ruh kaba la leh katkum ka Land Transfer Act jong ka jylla.
Shuh shuh halor ka jingpan jingtip u Bah Ardent ba lada don kino-kino ki jaka Sorkar ba la ai sha ki MLA lane sha ki bahaïing-bahasem jong ki, na ka liang u Myntri u la pyntip ba um don jingtip satia ba ïa ka jaka ka Sorkar la ai sha ki MLA lane sha ki bahaïing.
U Myntri u la ong ba ïa ki jaka sorkar yn nym lah ban leit sha ki ‘riewshimet bad ka sorkar kan ïada ruh ïa ki jaka ki bym hap hapoh ki jaka jong ka sorkar, bad pyntip ruh ba ha ki jaka ba la ai da ka sorkar ki nongshimwai ki lah ban tei ïa ki ïing paki dulan.
Ki jaka sorkar kiba la ai sha ki ‘riewshimet, ki tnat sorkar bad sha ki kynhun bapher bapher ka long 37,372.9468 hectare bad ka jaka sorkar kaba don baroh ka long 38, 181.9468 hectare.
Halor ka jingkylli jong u nongïalam ka Liang Pyrshah u Bah Ronnie V Lyngdoh ba hato ki don ki jaka Sorkar kiba la shah klun be-aiñ, u Myntri u la ong ba ki don katto-katne ki briew kiba pyrshang ban klun bad ki la leit ruh sha ïingbishar hynrei, “Ngi la ïeng skhem ha ka nongrim ba kine ki jaka ki dei jong ka Sorkar”.
