Shillong, Rymphang:
Ka Myntri ka tnat ka rep ka riang ka jylla, Kong Ampareen Lyngdoh, ha ka Lah Sngi U Blei ka la pyntip hapoh ka ïingdorbar ba na ki 50 tylli ki Cold Storage ne ki jaka pyndait thah ïa ki mar kiba don hapoh ka jylla, haduh 44 tylli ki dei kiba treikam.
Haba jubab halor ka jingkylli kaba la wanrah da ka MLA na Ampati ka Miani D Shira ha ki kynta kylli jingkylli, ka Myntri ka la pyntip halor ka jingdon ki ‘cold storage’ ba la shim jingkheiñ katkum ki district, ha kaba la ong ha East Khasi Hills ki don 8 tylli, West Khasi Hills 3 tylli, Eastern West Khasi Hills bad South West Khasi Hills mar 1, 8 tylli ha Ri-Bhoi, 7 tylli ha West Jaiñtia Hills, 3 tylli ha East Jaiñtia Hills, mar 5 tylli ha East Garo Hills bad West Garo Hills, 6 tylli ha North Garo Hills, 2 tylli ha South West Garo Hills bad 1 ha South Garo Hills.
Ka Myntri ka la pyntip ruh ba ki don haduh 11,908 ngut ki nongrep kiba la ïoh jingmyntoi na ka jingdon kine ki ‘cold storage’, kata 2,250 ngut ki nongrep ha East Khasi Hills, 476 ngut ha West Khasi Hills, 19 ngut ha Eastern West Khasi Hills, 10 ngut ha South West Khasi Hills, 4,540 ngut ha Ri-Bhoi, 1,867 ngut ha West Jaiñtia Hills, 252 ngut ha East Jaiñtia Hills, 210 ngut East Garo Hills, 1,870 ngut ha West Garo Hills, 374 ngut ha North Garo Hills, 30 ngut ha South Garo Hills bad 10 ngut ha South West Garo Hills.
Ka Myntri ka la pyntip ruh ba ka ‘Cold Storage’ kaba don ha Mawïong bad Garobada kim treikam shuh bad ka kaiphod kaba la dep ban aiti sha ka tnat ka la kdew ba kam long shuh kaba dang biang ban pynkhie im biang ïa ki. Kumta halor kane, ka sorkar ka la rai ban pynwandur noh ïa kine ar tylli ki jaka sha ka jaka kaba katkum kane kajuk ba mynta.
Ka la pyntip ruh ba ka cold storage kaba don ha Garobada ruh kam shym la treikam shuh naduh u snem 2008, bad ka jingeh kaba la pynpaw na kito kiba la shim wai ïa kane ka cold storage ki la ujor ba ki la mad ïa ka jingduhnong kaba khraw namar ka jingbym khlaiñ jong ka bording ban lah pynneh ïa ka jingdait thah.
