Shillong, Rymphang:
Ka Sorkar Pdeng ka khlem pynlong ïa ka jingïalang jong ka District Development Coordination and Monitoring Committee (DISHA) mynta la shisnem.
Ïa kane la ïathuh da u Myntri ka tnat pynroi nongkyndong u AT Mondal haba jubab ïa ka jingkylli u MLA ka Mawryngkneng u Bah Heavingstone Kharpran ha ka kynta kylli jingkylli ha Ïingdorbar.
Haba u Bah Kharpran u la kylli na kaei ka daw khlem pynlong ïa ka jingïalang jong ka DISHA ha East Khasi Hills District, na ka liang u Myntri u la ong ba kane ka dei kamram jong ki MP ban lum jingïalang.
Na ka liang u MLA ka Nongpoh, Bah Maralborn Syiem ruh u la buh kajuh ka jingkylli halor ka jingpynlong ïa ka jingïalang jong ka DISHA ha Ri Bhoi bad ka jubab ka long hi kumjuh.
Kumta u Bah Maralborn u la kyntu ban pynlong noh ïa kane ka jingïalang khnang ba ki nongmihkhmat kiba na ka district kin ïoh ban ïakren shibun ki kam pynroi kiba dei ban wan lyngba ka Sorkar Pdeng.
Na ka liang u Myntri Rangbah u Conrad K Sangma ruh u la ïeng ban bynrap ïa ka jubab jong u da kaba ïathuh ba ha ka por ba ma u ruh u long u MP ka Tura, ka jingpynlong ïa ka jingïalang jong ka DISHA ka dei kaba wan lyngba ka Sorkar Pdeng ha kaba ki nongmihkhmat ki donbynta lang naduh u MP bad ki MLA.
Ïa ka District Development Coordination and Monitoring Committee (DISHA) la thaw da ka Sorkar Pdeng da ka jingthmu ban pyntikna ba kan don ka jingïakynduh bad sngewthuh lang hapdeng ki MP, MLA na ka bynta ban ïakren ïa ka rukom pyntreikam bha ïa ki skhim bapher bapher jong ka Sorkar.
