Shillong, Rymphang 27
U Bah Sanbor Shullai uba dei u nongmihkhmat ka BJP napoh ka 19-South Shillong, u la ong ba lada ha u snem 2019 ki paidbah napoh ka Shillong Parliamentary Constituency ki la jied bad pynjop ïa u kum u MP ka Lok Sabha ha utei u snem katta u lah wanrah tang da ka um bad ka ngap hynrei phewse ki la pynjop pynban da u Bah Vincent H Pala ban long kum u MP.
“Ha kato ka por ki paidbah ka Ri Khasi bad Jaiñtia ki lah pynjop ïa u Bah Pala, te lada dei ba nga jop nga la long Myntri bad nga lah wanrah da ka um bad ka ngap”, la ong u Bah Sanbor.
Haba kren sha ki lad pathai khubor ha ka Sngi Ba-ar hapoh ka shlem treikam jong ka BJP, u Bah Sanbor u la ong ba ki paidbah ka Shillong Parliamentary Constituency ki la dei ban kylla noh ha kane ka kynti kaba mynta ym ban pynjop sah da u Bah Vincent Pala namar la 5 snem kynthih u Bah Pala u la shu ktha soh-ot ha kyndong hapoh Parliament khlem da wanrah ïa ka roi ka par.
“U Bah Pala la 5 snem u shu ktha soh-ot ha kyndong hapoh Parliament, ym don ka roi ka par eiei ruh lyngba u Bah Pala, ki paidbah kiba bun kim ju ïakynduh ïa u”, la ong u Bah Sanbor.
U Bah Sanbor u la kyntu ruh ïa ki paidbah ka jylla ba ki dei ban long kiba stad bad kiba ïohi jngai ym ba kin ngop ha ki jingshah pynshoi da kaba ki thep bad pynjop ïa ka BJP khamtam ba kane ka ilekshon ka dei ka ilekshon shapoh ka Lok Sabha.
U la ong ruh ba kum ki nongthep vote kim dei ban shu pynsepei ïa ka vote ban thep sha kiwei ki seng ki ban shu ktha soh-ot biang sa 5 snem kynthih harud surok.
“Balei pynsepei ïa ka vote jong phi sha ka seng kaba lada phi phah da kiwei-kiwei, ngi shu tieng ba sa 5 snem biang kin ktha soh-ot harud surok hynrei lada ki pynjop ïa ka Dr. Fenela, ma ka ruh kan wanrah da ka um bad ka ngap bad kane kan long ka jingmyntoi ïa ki samla khlem kam khlem jam, ki paidbah bad ki nongrep nongriang ba kin ïoh ïa ki jingïarap”, la ong u Bah Sanbor.
