Shillong, Rymphang 27
Ka Myntri ba khmih ïa ka tnat ka rep ka riang ka Jylla ka Kong Ampareen Lyngdoh ka la kubur ba ka la don ka jinghiar jong ka dor u synsar hapoh ka jylla.
Ka Myntri ha ka jubab ba ka la ai ha ka jingkylli kaba la wanrah da u MLA ka Mawkynrew u Bah Banteidor Lyngdoh ha ka ‘starred question’ kaba khlem poi ban ïatai hapoh ka ïingdorbar namar ka jingkut noh ka por kylli jingkylli, ka la ong ba ka tnat ka la don ka jingtip halor ka jinghiar ka dor jong u synsar.
Halor ka jingkylli ba na kaei ka daw ba hiar ka dor jong u synsar, ka jubab na ka Myntri ka long ba ki Jylla ba marjan kata ka Assam, Mizoram, Tripura bad Arunachal Pradesh ha kine 2 bad 3 snem ki la pynkiew bha ïa ka jingpynmih synsar ha la ki jong ki Jylla.
La pyntip ruh ba ka jaka ba rep synsar ha Meghalaya ruh ka la nangkiew bad ka jingkynshew (stock) synsar ba naduh u snem ba la leit, ka dang don ha ki kudam. Ka jingpynmih synsar na ki Jylla ba marjan kala nang pynbun ïa ka mar ha ki ïew ki hat, kaba la lam pat sha ka jinghiar ha ka dor jong u synsar.
Shuh shuh la ong ba ka jingdawa ïa u synsar ruh ka la nanghiar ha ki ïew na ka daw jong ka jingdon bad wad jong ki briew ïa ki synsar plastic.
Halor ka jingkylli ba hato na ka liang ka tnat ka la shim ki lad ki lynti ban peit ïa kane ka jingeh jong ka jinghiar dor u synsar, ka Myntri ka la pyntip ba ka tnat ka la shim katto katne ki lad ki lynti ban peit ïa ka jingeh na ka jinghiar dor jong u synsar bad ong ba ka Mawïong Wholesale Market ka don ïa ki kudam ba lah ban ngiam haduh palat 21,000 MT, bad kumta bun na kine ki kudam la pyndonkam ban buh ïa ki synsar ba la thad ha ka por ba hiar dor u synsar. Kumta kane ka la plie lad ïa ki nongrep ba kin ïoh kham heh ka dor.
Ka la pyntip ruh ba ka jingpoi mar man la ka sngi bad ka dor ïew jong u synsar la ju thep ha ka AGMARKET portal bad MEGAMB portal kaba lah ban ïohi lut da ki paidbah bad nongrep ba kin tip ïa ka dor ka mur.
