Khliehriat, Rymphang 27
Shi bynta na ka jingpynkhreh ïa ka ilekshon sha ka dorbar Lok Sabha, ki pulit ka East Jaiñtia Hills District ha ka 26 tarik Rymphang ki la pynlong ka jingkhynra kali ha Umkiang.
Ha kane ka jingkhynra kali ha ka por 10 baje janmiet, ki la ïoh bat ïa kawei ka Tata Truck 1512 kaba don ïa u Registration No. AS28-AC-1046 kaba wan na Kalain, Cachar Assam bad thmu ban kiew sha ka thaiñ Lumshnong, Meghalaya.
Ha kane jingkhynra kali ha ka jingdonlang ki nongsakhi, la ïoh kurup 2 tylli ki synduk sabon kiba suba ba ki dei kiba la thep drok beaiñ ryngkat ki thyrnia bad haba la khmih bniah la pynthikna ba u dei u drok ‘heroin’ uba don ka jingkhia 34.44 gram bad shong dor T.28 lak tyngka.
Hapoh ka kali la don u Dony Paya Mulieh ba dang 19 snem na ka shnong Khliehshnong Lumshnong bad u Langki Rymbai, 23 snem, na Dongdukan Lumshnong ba hap hapoh ka thanat Lumshnong ha East Jaiñtia Hills District.
Ha kaba ïadei bad kane, ki pulit ki la kem noh ïa kine ar ngut bad ïa ka case la register hapoh ka thanat Lumshnong katkum ka Case/ No. 07(02)24 u/s 21 (b)/ 29 NDPS Act.
