Shillong Rymphang 27
Ki MLA ka liang pyrshah ki la phet khlem wanphai shuh sha Ïingdorbar ha ka Sngi Ba-ar kaba dei ruh ka sngi bakut jong ka dorbar mang tyngka. Kane ka long hadien ba kine MLA ki la kynnoh ba ka rukom pynïaid dorbar kam long katkum ki kyndon haba ïadei bad ka mat ‘Demands for Grants’ kaba dei ai jingmynjur da ka Ïingdorbar Thawaiñ.
Ka jingphet ki MLA na ka liang pyrshah ka la wan hadien ba u MLA ka Congress na Umsning konstitwensi u Dr Celestine Lyngdoh u la kynnoh ba ka don ka jingbakla haba ïadei bad ka rukom wanrah ïa ka mat ‘Demands for Grants’ na ka bynta ban mynjur da ka Ïingdorbar.
U Dr Celestine u la ong ba katkum ki kyndon pynïaid dorbar, ka jubab halor ka jingïatai ïa ka mang tyngka ka dei ban wan ha ka bynta kaba nyngkong ha kaba u Myntri ba peit ïa ka pla tyngka un ai ïa ka jubab, nangta kan bud pat sa ka ‘Demands for Grants’ ha ka bynta ba-ar jong ka mang tyngka.
Une u MLA u la kdew ïa kane hashwa ba u Myntri Rangbah u Conrad K Sangma uba peit ïa ka pla tyngka un ai ïa ka jubab halor ka jingïatai ïa ka mang tyngka.
Hynrei u la ong ha kane ka dorbar, ka jingbuh ïa ka ‘Demands for Grants’ kam long katkum ki kyndon, namarba ïa ka ‘Demands for Grants’ la dep wanrah ha Ïingdorbar ha ka 23 tarik u Rymphang 2024 haduh 11 tylli, wat haba u Myntri ka tnat pla tyngka u khlem pat dep ban ai jubab halor ka jingïatai ïa ka mang tyngka bad u dang dei ban jubab mynta ka 27 tarik u Rymphang 2024.
La kumta ruh, u Dr Celestine u la pan jingshai na u Lamphang ka Ïingdorbar u Thomas A Sangma ha kano ka rukom yn leh ïa kane ka mat namarba lada ïaid katkum ki kyndon ka la bakla lypa bad u la ong ba lada ym ïaid katkum ki kyndon kam myntoi ban shong dorbar khamtam ïa kiba don ha ka liang pyrshah.
Ki MLA ba kynthup ïa u Dr Mukul Sangma ruh, u la kyrshan ïa kane ka jingkdew jong u Dr Celestine bad kyrshan ïa kaei kaba u la pan jingshai.
Na ka liang u Lamphang u la ong ba kane ka mat ka dei kaba la buh katkum ka jingpynbeit ïa ka dorbar ha kaba ka jingmynjur ïa ka ‘Demands for Grants’ ruh ka dang ïaid bad kam pat kut haduh mynta ka sngi ka 27 tarik u Rymphang 2024.
Kumta u Lamphang u la pynïaid shakhmat ïa ka dorbar bad na ka liang u Myntri Rangbah bad Symbud Myntri Rangbah Bah Prestone Tynsong ruh ki la ong ba ka jingbuh ïa ki mat ha ka dorbar ka dei kaba la dep pynbeit ruh ïa ki sngi ha ka Business Advisory Committee.
Kumta namarba u Lamphang u la pynïaid beit shakhmat ïa ki mat kiba la don ha kane ka sngi bakut ka dorbar, u Dr Celestine lem baroh ki MLA kiba don ha liang pyrshah ki la phet na Ïingdorbar bad ki khlem wanphai shuh wat ha ka por ba pynïaid sa ïa ka mat ‘Demands for Grants’.
Ha ka jingshisha, ki MLA ka liang pyrshah ki la wanrah ruh ïa ki ‘cut motion’ ban ïatai hashwa ban mynjur ïa ka ‘Demands for Grants’ hynrei namarba ki khlem don hapoh Ïingdorbar, u Lamphang u la pynïaid beit ban mynjur ïa baroh ki ‘Demands for Grants’. Baroh ki ‘Demands for Grants’ ki don 65 tylli.
