Shillong, Rymphang 27
U MLA ka NPP na Mawkynrew, Bah Banteidor Lyngdoh haba ai jingkren hapoh ïingdorbar thawaiñ u la ong ba wat la ka jingjia ïasiat ha Mukroh, West Jaiñtia Hills ka la jan dap 2 snem, hynrei ka khyrdop peitngor jong ka Sorkar Assam ka dang don sah ha katei ka jaka haduh mynta.
“La jan dap 2 snem naduh ba jia ka jingïasiat ha Mukroh. Nga ai khublei ïa ka Sorkar halor ka bai lutksan kaba la siew sha ki longïing kiba la mad ïa katei ka jingjia, hynrei ka khyrdop peitngor jong ka tnad khlaw ka Assam ka dang don sah ha Mukroh,” la ong u Bah Lyngdoh haba ïashim bynta ha ka jingïakren halor ka Mang Tyngka ha ka Sngi Ba-ar.
Kum ban shu kdew hangne, 6 ngut ki briew ba kynthup ïa 5 ngut na Meghalaya bad 1 na Assam ki la duh noh la ka jingim ha ka jingïasiat kaba la jia ha Mukroh ha ka 22 tarik Naiwieng, 2022.
Utei u nongmihkhmat u la buh jingkylli ruh ïa ka Sorkar la ka la shim ne em ïa ki sienjam ban weng ïa katei ka khyrdop peitngor jong ka tnad khlaw Assam kaba hap hapoh u pud u sam jong ka Meghalaya.
“Ngi donkam ban ai ka jingkyrmen ïa ki briew jong ngi kumjuh ban pyntikna ba dei ban weng noh kloi ïa kane ka khyrdop peitngor,” u la ong.
Haba phai sha ka jingong-jingman jong ki nongrep hapoh ka Jylla, u Bah Lyngdoh u la ong ba wat la ym don jingkheiñ kiba biang halor ki nongrep kiba la ithuh bad pynrung kyrteng bad ka Sorkar, hynrei ki nongrep ha kylleng ka Jylla ki donkam ïa ka jingkyrshan.
“Ngim tip katno ka jingkyrshan la ai sha ki nongrep ha kane ka shisnem ba la leit. Ngi kwah ban tip ïa ka jingbuh thong halor ka jingdon ki nongrep ki ban ioh jingmyntoi na kane ka Mang Tyngka,” u la ong.
Ha kajuh ka por, u la buh jingkylli ba ki lad jingkyrshan kiba kumno kiba ka Sorkar kan ai sha ki nongrep ha une u snem bad kumno yn pynbha ïa ka jingpynmih mar bad ka dor ka mur.
Haba kdew ba ka dor jong u synsar ka la kiew shi kat dei ha kine ki khyndiat snem ba la leit hadien ba la ithuh ïa u kum u mar-rep, u MLA ha kawei ka liang u la pynpaw ka jingsngewsih ba ha kine ki 1-2 snem, ka dor jong u synsar ka la hiar sha ka ` 50,000 shi ton, kata ` 50 shi kilo.
“Ha kano ka rukom ngin ïarap ïa ki nongrep synsar naba ki nongrep synsar ki bun bah hapoh ka Jylla. Ngi donkam ban kner jingïarap ïa ki nongrep synsar khnang ba ngi lah ban ïada ïa ka lad kamai jong ki,” u la ong.
Haba phai sha ka tnad Disaster Management, u Bah Lyngdoh u la kyrpad ïa u Myntri Rangbah ka Jylla, u Conrad K. Sangma ban shim khia lem halor ka jingsahteng ka pisa kaba dei ban siew sha ki longïing hapoh Mawkynrew C&RD Block kiba shah ktah ha ka jingpluh ding bad jingjulor namar u slap ha u snem 2022-23.
Haba pynpaw ka jingsngewkhia halor ka jingmang na bynta ka MGNREGA kaba la hiar sha ka ` 600 klur, u Bah Lyngdoh u la ong, “Balei kane ka jingmang ka la hiar na palat hajar klur sha ka ` 600 klur. Ki paidbah ki la duhnong bad ki paidbah kin sa shah knieh noh ïa ka hok ban trei.”
“La sngewthuh ruh ba ka Sorkar ka la pynbor ïa u ‘Aadhaar’ sha kito kiba don ‘Job Card’. Kane ka long pyrshah ïa ka bha ka miat jong ki nongshong shnong kiba don ka jingsheptieng ban pynïasoh bad u ‘Aadhaar’,” u la ong.
Shuh shuh haba pynsngew ba u la ïashem bad ki nongshong shnong hapoh konstitwensi kiba sheptieng ban pynïasoh bad u ‘Aadhaar’, u MLA u la kyrpad ïa ka Sorkar ban pynlong ïa ki prokram pynsaphriang jingtip haba ïadei bad kane ka bynta.
Na ka liang u Bah Lyngdoh haba kren halor ka jingpynher sted bad jingñiah kali khlemakor, kaba la ïalam ruh sha ka jingduh noh ïa ki mynsiem ba kordor, u la ban jur halor ka jingdonkam ban leh eiei bad pyntikna ba kiba donkti ha kitei kam kin shah pynshitom katkum ka aiñ.
