Guwahati, Rymphang 27
Ka nongbah Imphal ha Manipur ka la sakhi ïa ka jingïather kuli kaba jur hapdeng ki nongap pahara jong uwei u heh pulit bad ki ‘riew kieng atiar.
Kane ka jingïasiat ka la long habar ka ïing sah jong u Additional Superintendent of Police (Operations), u M Amit Singh, ha Wankhei jong ka Imphal West, la ong ki pulit.
Ha kane ka jingïather kuli, kitei ki ‘riew kieng atiar ki la pynjulor ïa ka ïing sah jong u Singh bad ka jaka ai dawai. Ki la don ruh ki kali kiba la julor. Ha ka longïing longsem jong u Singh, ki don haduh hynñiew ngut ki doktor.
Shuh shuh ki khubor ki ïathuh ba ki la don hapdeng 20 haduh 30 ngut ki ‘riew kieng atiar kiba la leit thombor ïa ka ïing jong utei u heh pulit hadien ba ki la plie jubor ïa ka khyrdop ïing. Hynrei utei u heh pulit um shym la don satia ha la ïing ha ka por ba ka la mih kane ka jingjia.
Ha ki rynsan ‘Social Media’, la pynsaphriang ïa ki dur khih kiba ïadei bad katei ka jingjia bad ki don ki ‘riew paidbah kiba la phet ban ïoh jaka rieh.
Na ka liang ki shipai, Assam Rifles bad ki pulit ka jylla ki la leit sha katei ka thaiñ bad ki la thwet ïa kitei ki ‘riew kieng atiar.
Lah ban kdew ba ka jingïakynad ha Manipur ka la sdang naduh u bnai Jymmang 2023 bad haduh mynta, palat 200 ngut ki la khlad bad da ki hajar ngut kiwei pat ki la kylla phet wir.
