Shillong, Rymphang 27
Wat hapdeng ka jingïalap bad jingpynsngewthuh ba ym dei ban ngop kulmar ha ki jingkular kiba ïoh lyngba ki rynsan ‘Social Media’, hynrei dang don pat kiba leit ngop ha ki jingpynthame. Kane ka la jia ïa kawei ka ‘riew kynthei na Them Basuk (Happy Valley) kaba la shah shukor ei haduh T.2 lak lyngba ka ‘Facebook’.
Katkum ka jingtip ba la ïohlum na ki pulit, la ong ba katei ka ‘riew kynthei ka la ujor ba u Naitung 2023, uwei na ki paralok jong ka ha ‘Facebook’, uba la ai kyrteng ïalade kum u Ravi Kumar, u la pyntip sha ka ba u phah ïa ka song (parcel).
Pynban kham hadien katto-katne sngi, katei ka briew ka la ïoh jingtip lyngba ka ‘phone’ ha kaba la bthah ba kan siew ïa ka pisa kaba T.55,000 khnang ban ïoh ïa katei ka song. Tangba wat hadien ba ka la siew ïa ka pisa, ka khlem ïoh satia ïa kata ka song bad ka la shah dawa pisa shuh-shuh pynban bad ka la shah byrngem byrsit ruh. Haba kheiñ naduh ba sdang haduh ba kut, katei ka briew ka la shah thok haduh T. 2 lak.
