Shillong Rymphang 27
Ka Ïingdorbar Thawaiñ ka la mynjur ïa ka mang tyngka ka Jylla na ka bynta u snem 2024-2025 lyngba ka jingmynjur ïa ka aiñ ‘The Meghalaya Appropriation (No.II) Bill, 2024’ ha kaba la antad ba ka jingïoh kan kot T. 23,545 klur khlem da kheiñlang ïa ka jingshimram bad ka jinglut kan kot sha ka T. 25,574 klur khlem da kynthup lang ïa ka jingsiew ram.
Baroh ka jinglut la mang palat T. 27,072 klur ha kaba ka jingshim ram la antad kumba T. 3,527 klur katba ka jingsiew ram kan long T. 1,498 klur.
Kane ka mang tyngka ka dei ruh kaba duna pisa da ` 2,029 klur kaba mih na ka jingïapher hapdeng ka jingïoh kaba long T. 23,545 klur bad ka jingpynlut kaba long T. 25,574 klur.
Kane ka jingmynjur ka pynlah ïa ka Sorkar Jylla ban pyndonkam ïa ka pisa kaba la mang na ka bynta ki jingdonkam bapher bapher jong ka Sorkar baroh shisnem jong u snem mang tyngka 2024-2025 kaba sdang naduh ka 1 tarik u Ïaïong, 2024 haduh 31 tarik Lber, 2025.
Ka Sorkar Jylla kan lah ban pyndonkam pisa katkum ka mang tyngka kaba long T. 27,072 klur, 2 lak, 98 hajar na ka bynta kiba bun ki jingdonkam kiba donkam ban pynlut baroh shisnem jong u snem mang tyngka u ban kut ha ka 31 tarik Lber 2025.
Ïa ka mang tyngka la wanrah ha Ïingdorbar Thawaiñ ha ka 21 tarik u Rymphang 2024 da u Myntri Rangbah uba peit ïa ka tnat pla tyngka u la ai kyrteng ïa ka kum ka ‘Mission 10’ ha kaba la buh 10 tylli ki jingplielad bad 10 tylli ki jingkular kiba dei ban pyntreikam.
La ong ba kine ki 10 tylli ki jingplie lad bad 10 tylli ki jingkular, ki long kum u mawnongrim ha kaba ka jingpynleit jingmut ka long ban pynpoi ïa ka Jylla sha ka thong jong ka ïoh ka kot kaba kot 10 billion US dollar ha kine ki snem ban wan.
“Ngin sa kynjoh sha ka thong jong ka ïoh ka kot kaba long 10 billion US dollar lyngba ka jingpynleit jingmut ïa ki 10 tylli ki bynta kiba long ka jingplie lad. Nga kwah ruh ban ban pynskhem ha ki 10 tylli ki jingkular ki ban pyntikna ba u nong Meghalaya un myntoi na ka jingkiew ka Jylla bad ba ka roi ka kiew ha kine ki saw snem kan long kaba ïaryngkat, kaba neh bad kaba shisha,” la pynpaw u Myntri Rangbah ha ka jingkren jong u shaphang ka mang tyngka ha Ïingdorbar.
U Myntri Rangbah u la kyntu ïa baroh ki dkhot jong ka Ïingdorbar bad ki nongshong shnong ban kynmaw ïa kane ka mang tyngka ‘Mission 10’ kaba dei ka jingtreikam kaba pynkhreh ban tei ïa ka ïoh ka kot kaba 10 billion US dollar lyngba ki 10 tylli ki jingplie lad bad 10 tylli ki jingkular.
“Ka jingpynpoi sha ka thong jong ka ‘Mission 10’ ha u snem 2028 kan sa wanlang ruh bad ka jingdap 10 snem ka Sorkar MDA,” la ong u Myntri Rangbah.
Ki 10 tylli ki jingplie lad hapoh ka ‘mission 10’ ki kynthup ïa ka jingkyntiew ïa ka rukom bei pisa ha ki kam pynroi, ka jingpynïasoh hapdeng ki thaiñ bad kyntiew ïa ka khaïi pateng ha khappud, ka jingpynkylla dur ïa ka sor, ka jingpyndonkam ïa ki kor ki bor bad pynkylla ïa ka Meghalaya kum ka ‘tech hub’, kham pynkiew shuh shuh palat arshah ïa ka jingkamai ki nongrep, pynkupbor bad kynthup ïa ki kynthei ha ka ïoh ka kot, kynthup bad aikam ïa ki samla, pynlong ïa ka Jylla kum ka jaka kaba biang tam ha ka kam jngohkai, ka ïoh ka kot kaba biang lang ha ka liang ka mariang bad ki lad ban pynmih bording.
Ki 10 tylli ki jingkular pat ki kynthup ïa ka jingpynïasoh kaba suk ha ka leit ka wan, ka jingbiang ka umbam umdih ïa baroh lyngba ki pipe um, ka kor internet kaba sted bad biang pura, ka jingtei ïing ïa kiba dei hok ban ïoh myntoi, ka jingbiang ka bording, ka koit ka khiah bad jaka ba biang ïa baroh, ka lad ban pule kaba pynkmen bad kaba bha tam, ka jingai jingshakri kaba pynsuk bad lah ban pynbeit ïa ki jingeh, sumar bad pynkupbor ïa ki jingtei jingshna ha shnong ha thaw na bynta ka jingbha.
