Shillong, Rymphang:
U MLA ka Nongpoh, Bah Maralborn Syiem u la ai jingmut ïa ka Sorkar ban pyntreikam ïa ka ‘Broadcasting Code of Ethics (BCE)’ kumba la pynmih da ka Sorkar Pdeng naduh u snem 2021 khnang ban khanglad ai jingtip kiba thok bad ïalam bakla ïa ki paidbah lyngba ki lad pathai jingtip kynthup ki rynsan pathai jingtip ha social media kum ki ‘YouTuber’ kiba pynmih da ki riewshimet ne kynhun.
U Bah Maralborn u la pynpaw ïa kane haba wanrah ïa ka jingpynsngew lyngba ka Zero Hour ha Ïingdorbar halor ka khubor ba shah pynthohbria u Bah BB Makdoh uba dei u nongïalam ka Synjuk Rangbah Shnong Ri Bhoi ha kaba la ujor ejahar ruh dang shen ïa kawei ka YouTube channel shimet kaba kyrteng ka Hynñiewtrep TV.
U Bah Maralborn u la ong ba kane ka jingjia ha ka 19 tarik u Rymphang, 2024 ka dei kaba la ïalam bakla ha kaba la buh bad pyni ïa u Bah Makdoh ha ka rukom kaba bakla lyngba katei ka YouTube channel.
Une u MLA na Nongpoh u la kdew ruh ïa ka jingmih bun tylli ki YouTube channel shimet kumba mih ki tit ha kaba u la ong ba ki don ki youtuber kiba pyni ïa ka jingshisha bad kaba dei hok, don pat ki youtuber kiba mih na ka bynta jongno-re-jongno.
U la ong ka jingmih ki youtuber kiba don ka jingthmu ban ïalam bakla ïa ki paidbah ka ktah ïa ka imlang sahlang da kaba ïathuh thok khamtam ki paidbah ha nongkyndong kiba shida kiba shu ngeit haba ki peit ha mobile phone ïa kaei kaba batai lyngba kita ki youtuber kiba don jingthmu ban ïalam bakla.
Kumta u la ai jingmut ba ka Sorkar kan pyntreikam ïa ka ‘Broadcasting Code of Ethics’ kaba la pynmih da ka Sorkar Pdeng naduh u snem 2021 na ka bynta ka jingbha lang jong baroh namar kane ka treikam lang ïa baroh ki lad pathai khubor kynthup kiba pathai ha ki social media khamtam ka kito kiba don ka jingthmu ban pynmih da ki khubor kiba thok ban ïalam bakla ïa ki nongshong shnong.
Na ka liang u Myntri Rangbah Conrad K Sangma, haba ïeng ban jubab, u la batai ïa kaei kaba la jia bad ka jingshah khot ha ki pulit ka Nongpoh Thanat ïa kito kiba shna ïa ka khubor thok.
U la ong ba ka tnat pulit ka don ruh ïa ka Cyber Crime Wing ban tohkit ïa ki kam thok lyngba ka jingpyndonkam ïa ki kor ki bor bad ki la don mynta kumba 42 tylli ki jingujor pyrshah ki kam runar kiba dei kita ki cyber crime.
Kumta u la kyntu ïa kito kiba thmu ban ai jingtip ba kin shna kaba don jingmut ban ïarap ïa kiwei pat.
U la ong ruh ba u la dep ban shim ïa ki jingai jingmut jong u MLA na Nongpoh kumno ban pyntreikam ïa ki kyndon kiba donkam ban bud ryntih haba pathai jingtip.
