Shillong, Rymphang 27
U MLA ka UDP na Nongpoh, Bah Mayralborn Syiem, ha ka Sngi Ba-ar u la pyntip hapoh ka ïingdorbar ba ki nongshong shnong ha ka thaiñ khappud bad kumjuh ha shnong Marmaiñ ki la don hapdeng ka jingshong syier na ka jingtah ‘poster’ jong ka Sanmilito Sanatan Samaj (SSS) pyrshah ïa ki skul Khristan.
Ïa kane u Bah Mayralborn u la pyntip hapoh ka ïingdorbar lyngba ka Zero Hour Notice kaba u la wanrah, ha kaba u la ong ba kane ka jingtah ‘poster’ da ka SSS ha kylleng ka Assam bad ha ki khappud ka la buh ïa ki nongpynïaid ki skul Balang hapdeng ka jingsyier bad ka jingbym shngaiñ ha ki thaiñ khappud bad khamtam ha ka thaiñ Marmaiñ kaba hap ha Nongpoh Constituency ha Ri-Bhoi District.
Une u MLA ka Nongpoh u la ong ba katkum ki jingthoh ba don ha ka ‘poster’ kiba la thoh ha ka ktien Assamese ïa kiba u la pyrshang ban pynkylla ha ka ktien phareng bad kaba donkam ban da pynthikna bha shwa, ka ong ba katei ka kynhun ka la maham ïa ki Missionary Khristan ban sangeh ban pynkylla ïa ki skul pule sha ki kynhun Balang, ka jingteh katkum ki kamram nongshong shnong ka ri India kumba pruid dak ha ka clause 51 A jong ka riti synshar ka Ri, kiar na ki kam ïaleh pyrshah ri, weng ïa ki muhor jingngeit niam ki riti dustur na ki skul pule bad ban sangeh noh ka jingsylla ban pynduh ïa ki jingtip barim bad ki riti dustur ka ri da kaba shim kabu kum ki rit paid.
Halor kane, u Myntri Rangbah ka Jylla Conrad K Sangma u la kular ïa ka jingshngaiñ bad jingïada ïa ki paidbah ba sah ha ki jaka khappud bad ka Assam.
U Myntri Rangbah u la ong, “Ngin sa pyntip ïa ki Superintendent of Police bad ki Deputy Commissioner ba kin pynkhlaiñ ïa ka jingïaid pahara ka ban pynthikna ba ki paidbah kin ïoh ïa ka jingshngaiñ bad ba kin ïoh ruh ïa ki jingïada lada dei ban mih kano kano ka jingjia.”
U Conrad u la ong, “Hynrei, kam dei pat ïa nga ban leh eiei khlem da wad ïa ka jingshisha. Namar kata, ngi donkam ban pynshisha shuwa ïa kane ka khubor bad ki jingtip shuwa ba ngin leh eiei, hynrei watla katta ruh ngin nym shim sting halor kane ka kam.”
Shuh shuh u Myntri Rangbah u la pyntip ruh ba na ka liang jong u, u la ju bteng ïa ka jingïakren na ka por sha ka por bad u Myntri Rangbah ka Assam u Himanta Biswa Sawma bad kumjuh ruh ka jingïakren ka ïaid ruh hapdeng ki Chief Secretary jong ki ar Jylla.
